തൃശ്ശൂർ:സേഫ് ആൻഡ് സ്ട്രോങ്ങ് നിക്ഷേപ തട്ടിപ്പ് കേസിലെ പ്രവീൺ റാണയെ പിടികൂടാനുള്ള നീക്കം ഊര്‍ജ്ജിതമാക്കി പൊലീസ്. പ്രവീണ്‍ റാണയെ അന്വേഷിച്ച് തൃശൂര്‍ ഈസ്റ്റ് പൊലീസ് കൊച്ചി കടവന്ത്രയിലെ ഫ്ലാറ്റിലെത്തുന്നതിന് തൊട്ടുമുന്‍പ് പ്രവീണ്‍ രക്ഷപ്പെട്ടു. പ്രവീണ്‍ റാണയുടെ നാല് വാഹനങ്ങൾ പൊലീസ് കൊച്ചിയിൽ നിന്ന് പിടിച്ചെടുത്തു.
പ്രവീണ്‍ റാണ കൊച്ചി കടവന്ത്രയിലെ ഇയാളുടെ പങ്കാളിയുടെ ഫ്ലാറ്റിൽ ഉണ്ടെന്നുള്ള വിവരത്തെ തുടര്‍ന്നാണ് തൃശൂര്‍ ഈസ്റ്റ് പൊലീസ് സംഘം കൊച്ചിയിലെത്തിയത്. എന്നാൽ, പൊലീസ് സംഘം ഫ്ലാറ്റിൽ എത്തുന്നതിന് തൊട്ടുമുമ്പ് ഇയാൾ രക്ഷപ്പെടുകയായിരുന്നു. ഇയാള്‍ ബിഎംഡബ്ല്യൂ കാറിൽ ചാലക്കുടി ഭാഗത്തേക്ക് രക്ഷപ്പെട്ടെന്ന വിവരത്തെ തുടർന്ന് ചാലക്കുടിയിൽ വച്ച് വാഹനം തടഞ്ഞുവെങ്കിലും പ്രവീൺ കാറില്‍ ഇല്ലായിരുന്നു.