2000 രൂപയും ഒരു കുപ്പി മദ്യവും; കൈക്കൂലി വാങ്ങുന്നതിനിടെ ഗ്രേഡ് എസ്ഐ പിടിയിൽ

ഗാന്ധിനഗർ പൊലീസ് സ്റ്റേഷനിലെ ഗ്രേഡ് എസ്ഐ നസീർ വിഎച്ച് ആണ് കൈക്കൂലിക്കേസിൽ പിടിയിലായത്. അപകടത്തിൽപ്പെട്ട വാഹനം വിട്ടുനൽകുന്നതിനാണ് 2000 രൂപയും മദ്യവും കൈക്കൂലിയായി ആവശ്യപ്പെട്ടത്.

കോട്ടയം:അപകടത്തിൽപ്പെട്ട വാഹനം വിട്ടു നൽകാൻ കൈക്കൂലി ആവശ്യപ്പെട്ട ഗ്രേഡ് എസ്ഐ വിജിലൻസ് പിടിയിൽ. കോട്ടയം ഗാന്ധിനഗർ പൊലീസ് സ്റ്റേഷനിലെ ഗ്രേഡ് എസ്ഐ നസീർ വിഎച്ച് ആണ് കൈക്കൂലി വാങ്ങുന്നതിനിടെ പിടിയിലായത്. വാഹനം വിട്ടുനൽകുന്നതിന് 2000 രൂപയും ഒരു കുപ്പി മദ്യവുമാണ് നസീർ കൈക്കൂലിയായി ആവശ്യപ്പെട്ടത്.

കോട്ടയം മെഡിക്കൽ കോളജിനു സമീപത്തുള്ള കേരള ടൂറിസ്റ്റ് ഹോമിൽ മുറിയെടുത്ത ശേഷം പരാതിക്കാരനിൽ നിന്നും പണവും മദ്യക്കുപ്പിയും ഇയാൾ കൈക്കൂലിയായി വാങ്ങുകയായിരുന്നു. പരാതിക്കാരൻ വിവരം അറിയിച്ചതനുസരിച്ച് സ്ഥലത്ത് എത്തിയ വിജിലൻസ് സംഘം ഇയാളെ പിടികൂടി. വിജിലൻസ് ആൻഡ് ആന്‍റി കറപ്ഷൻസ് ബ്യൂറോ എസ്‌പി വി ജി വിനോദ്‌ കുമാറിന്‍റെ നേതൃത്വത്തിലുള്ള സംഘമാണ് ഇയാളെ പിടികൂടിയത്.