കൊലപാതകക്കേസ് പ്രതിയെ നടുറോഡിൽ വെട്ടിക്കൊന്നു; സിസിടിവി ദൃശ്യങ്ങൾ വൈറൽ

നേരത്തേ രഞ്ജിത്തും ഇയാളുടെ കൂട്ടാളികളും ചേർന്ന് മറ്റൊരു ഗുണ്ടാസംഘത്തിലെ അംഗമായിരുന്ന റൗഡി അലക്‌സിനെ കൊലപ്പെടുത്തിയിരുന്നു.

ചെന്നൈ:കൊലപാതകക്കേസ് പ്രതിയെ ആറംഗ സംഘം നടുറോഡിൽ വെട്ടിക്കൊന്നു. ചെന്നൈയിലെ വില്ലിവാക്കം പ്രദേശത്ത് വ്യാഴാഴ്‌ചയാണ് (10.03.22) ഞെട്ടിക്കുന്ന സംഭവം. 'ഡബിൾ' രഞ്ജിത്ത് എന്നറിയപ്പെടുന്ന രഞ്ജിത്താണ് ആക്രമണത്തിൽ കൊല്ലപ്പെട്ടത്. കൊലപ്പെടുത്തുന്നതിന്‍റെ സിസിടിവി ദൃശ്യങ്ങൾ സിറ്റി പൊലീസ് പുറത്തുവിട്ടു.

വ്യാഴാഴ്‌ച വൈകുന്നേരമായിരുന്നു സംഭവം. നേരത്തേ രഞ്ജിത്തും ഇയാളുടെ കൂട്ടാളികളും ചേർന്ന് മറ്റൊരു ഗുണ്ടാസംഘത്തിലെ അംഗമായിരുന്ന റൗഡി അലക്‌സിനെ കൊലപ്പെടുത്തിയിരുന്നു. സംഭവത്തിൽ രഞ്ജിത്തിനെയും സംഘത്തെയും പൊലീസ് അറസ്റ്റ് ചെയ്‌തു. കഴിഞ്ഞ കുറേ മാസങ്ങളായി ജയിലിൽ കഴിഞ്ഞിരുന്ന ഇവർ കഴിഞ്ഞയാഴ്‌ചയാണ് ജാമ്യത്തിൽ പുറത്തിറങ്ങിയത്.

ഇതിന്‍റെ പ്രതികാരമായാണ് അലക്‌സിന്‍റെ കൂട്ടാളികൾ അലക്‌സിനെ കൊലപ്പെടുത്തിയ അതേ സ്ഥലത്തുവച്ച് തന്നെ രഞ്ജിത്തിനെയും കൊലപ്പെടുത്തിയതെന്നാണ് പൊലീസ് പറയുന്നത്. ബൈക്കിൽ രക്ഷപ്പെടാൻ ശ്രമിക്കുന്ന രഞ്ജിത്തിനെ പിടികൂടിയ സംഘം വെട്ടിക്കൊലപ്പെടുത്തുന്നത് ദൃശ്യങ്ങളിൽ വ്യക്തമാണ്. സിസിടിവി ദൃശ്യങ്ങളും മറ്റ് തെളിവുകളും ഉപയോഗിച്ച് കൊലയാളികളെ കണ്ടെത്താനുള്ള ശ്രമത്തിലാണ് പൊലീസ്.