ഇടുക്കി : തേനിയിലെ കൈലാസപട്ടിയില്‍ ഫെന്‍സിങ്ങില്‍ നിന്ന് ഷോക്കേറ്റ് പുലി ചത്ത സംഭവത്തില്‍ സ്ഥലം ഉടമയും തേനി എംപിയുമായ ഒപി രവീന്ദ്രനാഥിനെതിരെ അന്വേഷണം ആവശ്യപ്പെട്ട് ലോക്‌സഭ സ്‌പീക്കര്‍ക്ക് കത്തയച്ച് വനം വകുപ്പ്. കുറച്ച് ദിവസങ്ങള്‍ക്ക് മുമ്പാണ് കൈലാസപട്ടിയിലെ രവീന്ദ്രനാഥിന്‍റെ ഉടമസ്ഥതയിലുള്ള തോട്ടത്തില്‍ സ്ഥാപിച്ച ഫെന്‍സിങ്ങില്‍ നിന്ന് ഷോക്കേറ്റ് പുലി ചത്തത്.
ഇതിന് പിന്നാലെ വിഷയത്തില്‍ അന്വേഷണം വേണമെന്നാവശ്യപ്പെട്ട് ഡിഎംകെയുടെ തേനി ജില്ല സെക്രട്ടറി തങ്ക തമിഴ് സെൽവനും പെരിയകുളം എംഎൽഎ ശരവണകുമാറും ചേര്‍ന്ന് വനം വകുപ്പ് ഓഫിസര്‍ സമൃതയ്ക്ക് പരാതി നല്‍കി. പരാതിയുടെ അടിസ്ഥാനത്തില്‍ മേഖലയില്‍ ആട് ഫാം നടത്തുന്നയാളെയും ഒപി രവീന്ദ്രന്‍റെ രണ്ട് മാനേജര്‍മാരെയും അറസ്റ്റ് ചെയ്‌തു.