കാസർകോട്:പ്രവാസി യുവാവിന്‍റെ കൊലപാതകത്തിൽ ക്വട്ടേഷൻ സംഘം വിദേശത്തേക്ക് കടക്കാനുള്ള സാധ്യത കണക്കിലെടുത്ത് ലുക്ക്ഔട്ട് നോട്ടിസ് പുറത്തിറക്കി. പൈവളിക ക്വട്ടേഷൻ സംഘത്തിലെ ഏഴ് പേർക്ക് എതിരെയാണ് പൊലീസ് ലുക്ക്ഔട്ട് നോട്ടിസ് ഇറക്കിയത്. കൊലപാതകത്തിന് ശേഷം പ്രതികൾ കർണാടക ഉൾപ്പടെയുള്ള മറ്റ് സംസ്ഥാനങ്ങളിലേക്ക് കടന്നുവെന്നായിരുന്നു പൊലീസിന്‍റെ നിഗമനം.
ഇതേ തുടർന്ന് പ്രത്യേക അന്വേഷണ സംഘത്തിന്‍റെ നേതൃത്വത്തിൽ കർണാടക, ഗോവ എന്നീ സംസ്ഥാനങ്ങള്‍ കേന്ദ്രീകരിച്ച് തിരച്ചില്‍ നടത്തി. എന്നാല്‍ പ്രതികളെ കണ്ടെത്താനായില്ല. ഇതിനിടെയാണ് പ്രതികൾ വിദേശത്തേക്ക് കടക്കാൻ സാധ്യതയുണ്ടെന്ന സൂചന പൊലീസിന് ലഭിച്ചത്.