കോട്ടയം: തൃക്കൊടിത്താനത്ത് യൂത്ത് കോൺഗ്രസ് പ്രവർത്തകരെ വീട്ടിൽ കയറി മർദിച്ച സംഭവത്തിൽ ഒളിവില്‍ പോയ പ്രാദേശിക സിപിഎം നേതാക്കൾ അറസ്റ്റിൽ. സി.പി.എം വാര്‍ഡ് മെമ്പറായ ബൈജു വിജയന്‍, പാര്‍ട്ടി ബ്രാഞ്ച് സെക്രട്ടറി സുനില്‍ എന്നിവരാണ് അറസ്റ്റിലായത്. കഴിഞ്ഞ വ്യാഴാഴ്‌ച(11.08.2022) യൂത്ത് കോൺഗ്രസ് ജില്ല സെക്രട്ടറി മനുകുമാര്‍, ബ്ലോക്ക് സെക്രട്ടറി ആന്‍റോ ആന്‍റണി എന്നിവര്‍ക്കാണ് മര്‍ദനമേറ്റത്.
സിപിഎം ശക്തികേന്ദ്രമായ മണികണ്‌ഠ വയലിൽ യൂത്ത് കോൺഗ്രസ് യൂണിറ്റ് ആരംഭിച്ചതാണ് ആക്രമണത്തിന് കാരണമായത്. ബൈജുവിന്‍റെ നേതൃത്വത്തിലെത്തിയ സംഘം കമ്പി വടിക്കൊണ്ട് അടിച്ച് ഇരുവരെയും പരിക്കേല്‍പ്പിക്കുകയായിരുന്നു. പരിക്കേറ്റ ഇരുവരെയും കോട്ടയം മെഡിക്കൽ കോളജില്‍ പ്രവേശിപ്പിച്ചു.