പാലക്കാട്: കഞ്ചിക്കോട്ട്‌ കോളജ് ബസ് തടഞ്ഞ് വിദ്യാർഥികളെ മർദിച്ച കേസിൽ കോളജ് വിദ്യാർഥി ഉൾപ്പെടെ അഞ്ച് ആർഎസ്എസ് പ്രവർത്തകരെ വാളയാർ പൊലീസ് അറസ്‌റ്റ് ചെയ്‌തു. പ്രദേശത്തെ സജീവ ആർഎസ്എസ് - ബിജെപി പ്രവർത്തകരായ രോഹിത്ത് (20), അക്ബർ (25), സുജീഷ് (25), നിഖിൽ (22), സത്യദത്ത് (21) എന്നിവരെയാണ് അറസ്‌റ്റ് ചെയ്‌തത്. വ്യാഴാഴ്‌ച ദേശീയപാതയിൽ കഞ്ചിക്കോട് റെയിൽവേ സ്‌റ്റേഷൻ ജംഗ്‌ഷനു സമീപം ചാവടിയിലെ സ്വകാര്യ കോളജ് ബസ് തടഞ്ഞുനിർത്തി വിദ്യാർഥികളെ അഞ്ചുപേർ ചേർന്ന്‌ ആക്രമിക്കുകയായിരുന്നു.
വ്യാഴാഴ്‌ച രാവിലെ കോളജിനു മുന്നിൽ വച്ച് ബസിലെ സീറ്റിനെച്ചൊല്ലി വിദ്യാർഥികൾ തമ്മിൽ വാക്കേറ്റമുണ്ടായിരുന്നു. അതിൽ കോളേജ് വിദ്യാർഥിയായ രോഹിത്തിന്‌ മർദനമേറ്റു. ഇതിന്‍റെ പ്രതികാരമായാണ് ആർഎസ്എസ് പ്രവർത്തകർ ബസിൽ കയറി വിദ്യാർഥികളെ ക്രൂരമായി മർദിച്ചത്.