ജനങ്ങളുടെ കുടിവെള്ളം മുട്ടിച്ച് ടർപ്പൻടൈൻ മിക്സിംഗ് കമ്പനി

തൃശൂര്‍ കൊഴുക്കുള്ളിയിലെ കമ്പനിക്കെതിരെയാണ് ആരോപണം. മാലിന്യം മണ്ണിനടിയിലൂടെ കിണറുകളില്‍ എത്തുന്നതായി പരാതി

തൃശൂർ കൊഴുക്കുള്ളിയിലെ അടച്ചുപൂട്ടിയ ടർപ്പൻടൈൻ മിക്സിംഗ് കമ്പനിയിലെ മാലിന്യം പ്രദേശവാസികളുടെ കുടിവെള്ളം മുട്ടിക്കുന്നു. കമ്പനി അടച്ചുപൂട്ടിയ സമയത്ത് സ്ഥലത്ത് കുഴിച്ചിട്ട മാലിന്യം മണ്ണിനടിയിലൂടെ സമീപത്തെ കിണറുകളില്‍ എത്തുന്നുവെന്നാണ് നാട്ടുകാർ പറയുന്നത്. പാടകെട്ടിയ കിണർവെള്ളത്തിന് ടർപ്പൻടൈന്‍റെ ഗന്ധവമുണ്ട്. ഈ വെള്ളത്തിൽ കുളിക്കുന്നവർക്ക് അലർജി രോഗങ്ങള്‍ ഉണ്ടാകുന്നതായാണ് പരാതി. കമ്പനി കുഴിച്ചിട്ട മാലിന്യങ്ങൾ നീക്കണമെന്നാണ് നാട്ടുകാരുടെ ആവശ്യം. അടുത്തിടെയാണ് മലിനീകരണ നിയന്ത്രണ ബോര്‍ഡ് കമ്പനി അടപ്പിച്ചത്. അനുമതിയില്ലാതെ ബിറ്റുമിൻ ഉരുക്കി ജപ്പാൻ ബ്ലാക്ക് ഉണ്ടാക്കുന്നതായി പരിശോധനയില്‍ കണ്ടെത്തിയിരുന്നു.