അതിരപ്പിള്ളി പദ്ധതി നടപ്പാക്കണമെന്ന് പിസി ജോർജ്

കേരളത്തിൽ ഇനി നടപ്പാക്കാൻ കഴിയുന്ന ഏക ജലവൈദ്യുത പദ്ധതി അതിരപ്പള്ളി ആണന്ന് പിസി ജോർജ്.

തിരുവനന്തപുരം : അതിരപ്പള്ളി ജലവൈദ്യുത പദ്ധതി നടപ്പാക്കിയേ മതിയാകൂ എന്ന് നിയമസഭയിൽ പിസി ജോർജ്. തെറ്റിദ്ധാരണ പരത്തി പദ്ധതി തടയരുത്. കേരളത്തിൽ ഇനി നടപ്പാക്കാൻ കഴിയുന്ന ഏക ജലവൈദ്യുത പദ്ധതി അതിരപ്പള്ളി ആണ്. വിഷയത്തിൽ എതിർപ്പുയർത്തുന്ന സിപിഐ സംസ്ഥാന സെക്രട്ടറി കാനം രാജേന്ദ്രനുമായി താൻ സംസാരിച്ചുവെന്നും വൈദ്യുതി വകുപ്പിന്‍റെ ധനാഭ്യർഥന ചർച്ചക്കിടെ പിസി ജോർജ് പറഞ്ഞു. എന്നാൽ ധനാഭ്യർത്ഥന ചർച്ചയ്ക്ക് മറുപടി പറഞ്ഞ വൈദ്യുതി മന്ത്രി എംഎം മണി ഈ വിഷയം അവഗണിച്ചു. ഇതോടെ പ്രതിപക്ഷം അതിരപള്ളിയിൽ വൈദ്യുതി മന്ത്രിയുടെ മറുപടി എന്താണെന്ന് വിളിച്ചു ചോദിച്ചു. വ്യത്യസ്ത വീക്ഷണമുള്ളവർ മന്ത്രിസഭയിൽ തന്നെയുണ്ടെന്നും പ്രതിപക്ഷം ചോദ്യം ഉന്നയിക്കുന്നതിന്‍റെ ഉദ്ദേശം തനിക്കറിയാമെന്നും മന്ത്രി മറുപടി നൽകി.