തിരുവനന്തപുരം: കേരള സര്‍വകലാശാല മലയാളം മഹാ നിഘണ്ടു എഡിറ്റര്‍ തസ്‌തികയില്‍ നിന്നും ഡോ. പൂര്‍ണിമ മോഹന്‍ രാജിവച്ചു. സ്വമേധയാ ഒഴിയാനുള്ള തീരുമാനത്തിന് സിന്‍ഡിക്കേറ്റ് യോഗം അംഗീകാരം നല്‍കിയതിനെത്തുടർന്നാണ് രാജി. മുഖ്യമന്ത്രിയുടെ ഓഫീസര്‍ ഓണ്‍ സ്‌പെഷ്യല്‍ ഡ്യൂട്ടിയായ ആര്‍.മോഹനന്‍റെ ഭാര്യയാണ് പൂര്‍ണ്ണിമ മോഹന്‍.
സംസ്‌കൃതം അധ്യാപികയായ പൂര്‍ണിമ മോഹനെ മലയാളം മഹാനിഘണ്ടു എഡിറ്റര്‍ തസ്‌തികയില്‍ നിയമിച്ചത് വിവാദമായിരുന്നു. നിയമനത്തിന് ആവശ്യമായ യോഗ്യതയില്ലെന്നായിരുന്നു ആരോപണമുയര്‍ന്നത്. 2020 ഡിസംബര്‍ 29ന് ചേര്‍ന്ന സിന്‍ഡിക്കേറ്റ് യോഗം വിസിയുടെ നിര്‍ദ്ദേശ പ്രകാരം പ്രത്യേക അജണ്ടയായി ഉള്‍പ്പെടുത്തിയാണ് നിയമനം തീരുമാനിച്ചത്.