'ലോകത്ത് ആരും വിശ്വസിക്കാത്ത ആരോപണങ്ങള്‍'; വികസനം അട്ടിമറിക്കാന്‍ ശ്രമമെന്ന് പി രാജീവ്

സ്വപ്‌ന സുരേഷിൻ്റെ ആരോപണങ്ങളെ തുടർന്ന് പ്രതിപക്ഷ സംഘടനകൾ നടത്തുന്ന പ്രതിഷേധ സമരങ്ങള്‍ക്കെതിരെ പി രാജീവ്

എറണാകുളം : കേരളത്തിൽ അരാജകത്വം സൃഷ്‌ടിച്ച് വികസനം അട്ടിമറിക്കാനുള്ള പ്രവർത്തനമാണ് പ്രതിപക്ഷ പ്രതിഷേധത്തിൻ്റെ പേരിൽ നടക്കുന്നതെന് മന്ത്രി പി രാജീവ്. ലോകത്ത് ആരും വിശ്വസിക്കാത്ത ആരോപണങ്ങളാണ് സ്വപ്‌ന സുരേഷ് ഉന്നയിക്കുന്നത്. ഓരോ പ്രഖ്യാപനങ്ങളും വെളിപ്പെടുത്തലുകളും വെറും അസംബന്ധമാണ്.

കേരള സമൂഹം ഇത് വിശ്വസിക്കില്ല. ഈ വിഷയത്തിൽ കേരളത്തിലെ മാധ്യമ സമൂഹം പുനർവിചിന്തനത്തിന് തയ്യാറാകണമെന്നും മന്ത്രി ആവശ്യപ്പെട്ടു. ഇപ്പോൾ ഉന്നയിക്കുന്ന ആരോപണങ്ങൾ ഇതിനേക്കാൾ ശക്തമായി പ്രതിപക്ഷവും ഒരു വിഭാഗം മാധ്യമങ്ങളും പ്രചരിപ്പിച്ചതിന്‌ ശേഷം നടന്ന തെരഞ്ഞെടുപ്പിൽ 99 സീറ്റ് നേടിയാണ് ഇടതുമുന്നണി അധികാരത്തിലെത്തിയത്.

ഒരു വർഷം പിന്നിടുമ്പോൾ വികസന പ്രവർത്തനങ്ങളുമായി സര്‍ക്കാര്‍ അതിവേഗം മുന്നോട്ടുപോവുകയാണ്. ഇതിനെ അട്ടിമറിക്കാനുള്ള ശ്രമത്തിന് മാധ്യമങ്ങൾ നിന്നുകൊടുക്കരുതെന്നും മന്ത്രി പറഞ്ഞു.