തിരുവനന്തപുരം: സാംസ്‌കാരിക മേഖലയില്‍ 157 കോടിരൂപ പ്രഖ്യാപിച്ച് ധനമന്ത്രി തോമസ് ഐസക്ക്. വിവിധ അക്കാദമികള്‍, സാംസ്‌കാരിക സ്ഥാപനങ്ങള്‍, മ്യൂസിയങ്ങള്‍ എന്നിവക്കായി പണം വകയിരുത്തിയിട്ടുണ്ട്. വനിത സംവിധായകരെ പ്രോത്സാഹിപ്പിക്കുന്നതിന് മൂന്ന് കോടി രൂപയും പട്ടിക വിഭാഗ സംവിധായകരുടെ പ്രോത്സാഹനത്തിന് രണ്ട് കോടി രൂപയും വകയിരുത്തി. ഒരാള്‍ക്ക് നല്‍കുന്ന ധനസഹായം 50 ലക്ഷം രൂപ. അമച്ചർ നാടകങ്ങള്‍ പ്രോത്സാഹിപ്പിക്കുന്നതിന് മൂന്ന് കോടി രൂപ വകയിരുത്തി. ഒരു നാടകത്തിന് അഞ്ച് ലക്ഷം രൂപയാണ് നല്‍കുക. പ്രൊഫഷണല്‍ നാടകങ്ങള്‍ക്ക് വേണ്ടി 2 കോടിയും വകയിരുത്തി. ജനപങ്കാളിത്തത്തോടെ പുരാവസ്‌തു രേഖ ഡിജിറ്റലൈസ് ചെയ്‌ത് സൂക്ഷിക്കുന്നതിന് സ്കീം ആരംഭിക്കും.
മലയാളം മിഷന് 4 കോടി രൂപ വകയിരുത്തി. കൊച്ചി കടവന്തറയില്‍ സിനിമ പോസ്റ്റ് പ്രൊഡക്ഷന്‍ സെന്‍റര്‍ ആരംഭിക്കും. കലാകാരന്മാരുടെ വാസനയും നൈപുണ്യവും പ്രോത്സാഹിപ്പിക്കുന്നതിന് അന്തര്‍ ദേശീയ കലാ കമ്പോളവുമായി ബന്ധിപ്പിക്കുന്നതിനും റൂറല്‍ ആര്‍ട്ട് ഹബ്ബുകള്‍ തുടങ്ങും. സാംസ്‌കാരിക തെരുവ് പൊതു ഇടങ്ങളില്‍ ആരംഭിക്കുന്നതിന് സ്കീമുകള്‍ സൃഷ്ടിക്കും. യുവ കലാകാരന്മാര്‍ക്കുള്ള ആയിരം ഫെലോഷിപ്പ് തുടരും. ഫീല്‍ഡ് ആര്‍ക്കിയോളജിക്ക് അഞ്ച്കോടി രൂപ അനുവദിച്ചു. സാഹിത്യ പ്രവര്‍ത്തന സംഘത്തിന്‍റെ പ്ലാറ്റിനം ജൂബിലിയുടെ ഭാഗമായി കോട്ടയത്ത് സാഹിത്യ മ്യൂസിയം സംഘടിപ്പിക്കും. കിളിമാനൂര്‍ പ്രൈവറ്റ് ബസ് സ്റ്റാന്‍റിന് രാജാ രവി വര്‍മയുടെ സ്മാരകമായി അന്തര്‍ദേശീയ നിലവാരത്തില്‍ ആര്‍ട്ട് സ്ക്വയര്‍ നിര്‍മിക്കും. പട്ടികജാതി പട്ടിക വര്‍ഗ വിഭാഗത്തിലെ നവോത്ഥാന നായകര്‍ക്ക് അവരുടെ നാട്ടില്‍ സ്മാരകം നിര്‍മിക്കുന്നതിന് 25 ലക്ഷം രൂപ വീതം അനുവദിക്കും.