കോടതി രേഖകളിൽ കൃത്രിമം നടത്തിയവർക്കെതിരെ അന്വേഷണം വേണമെന്ന് പി എസ് ശ്രീധരൻപിള്ള

ആർഎസ്എസ്- ബിജെപി പ്രവർത്തകരെ കുടുക്കാൻ കൃത്രിമം കാട്ടിയ കോടതിയിലെ ഉദ്യോഗസ്ഥർക്കും സിപിഎം നേതാക്കൾക്കുമെതിരെയാണ് ശ്രീധരൻപിള്ള അന്വേഷണം ആവശ്യപ്പെട്ടത്

തിരുവനന്തപുരം:കോടിയേരി ദാസൻ വധവുമായി ബന്ധപ്പെട്ട് കോടതി രേഖകളിൽ കൃത്രിമം നടത്തിയ ഉദ്യോഗസ്ഥർക്കും സിപിഎം നേതാക്കൾക്കുമെതിരെ അന്വേഷണം നടത്തണമെന്ന് ബിജെപി സംസ്ഥാന അധ്യക്ഷൻ പി എസ് ശ്രീധരൻപിള്ള ആവശ്യപ്പെട്ടു. രേഖകളിൽ കൃത്രിമം കാട്ടിയതിനെതിരെ ഹൈക്കോടതി ശക്തമായ നിലപാട് എടുത്തിരുന്നു. കോടതി സൂക്ഷിച്ചിരുന്ന രേഖകളിലെ പേജ് മാറ്റി പകരം പുതിയ പേജ് കൂട്ടിച്ചേർത്തു. സിപിഎം നേതാവ് കോടിയേരി ദാസൻ വധക്കേസിൽ ആർഎസ്എസുകാരെ കുടുക്കാനാണ് കോടതി രേഖകളിൽ കൃത്രിമം കാട്ടിയതെന്നും പി എസ് ശ്രീധരൻ പിള്ള പറഞ്ഞു.

പ്രളയ സഹായം അഭ്യർത്ഥിച്ച് വിദേശയാത്ര നടത്താൻ ഒരുങ്ങിയ മന്ത്രിമാർക്ക് അനുമതി നൽകാതിരുന്ന കേന്ദ്രസർക്കാർ നിലപാട് ശരിയെന്ന് തെളിഞ്ഞതായും ശ്രീധരൻ പിള്ള അഭിപ്രായപ്പെട്ടു. മുഖ്യമന്ത്രി പോയിട്ടുപോലും ഒന്നും ലഭിക്കാത്ത സാഹചര്യത്തിൽ മറ്റു മന്ത്രിമാർ പോയിട്ട് എന്തുനേട്ടം ഉണ്ടാകുമായിരുന്നു എന്നും അദ്ദേഹം ചോദിച്ചു. തോമസ് ഐസക്കിനെതിരെ കൊടുത്ത മാനനഷ്ടക്കേസിന് അദ്ദേഹം മറുപടി നൽകിയിട്ടില്ലെന്നും സ്റ്റാറ്റ്യൂട്ടറി പിരീഡ് കഴിയുന്നതോടെ അദ്ദേഹത്തിനെതിരെ തുടർനടപടികൾ സ്വീകരിക്കുമെന്നും ശ്രീധരൻപിള്ള തിരുവനന്തപുരത്ത് പറഞ്ഞു.