തിരുവനന്തപുരം: ട്രാന്‍സ്‌ജെന്‍ഡര്‍ വ്യക്തികളുടെ ലിംഗമാറ്റ ശസ്ത്രക്രിയകള് പഠിക്കുന്നതിന് വിദഗ്‌ധ സമിതി. ലിംഗമാറ്റ ശസ്‌ത്രക്രിയയും അനുബന്ധമായ ആരോഗ്യ സേവനങ്ങളും സംബന്ധിച്ച കാര്യങ്ങളാണ് സമിതി പരിശോധിക്കുക.
ട്രാന്‍സ്‌ജന്‍ഡര്‍ സമൂഹത്തിന് ഏറ്റവും അനുകൂലമായ രീതിയില്‍ സാഹചര്യങ്ങള്‍ സൃഷ്‌ടിക്കുന്നതിനും സ്വീകരിക്കേണ്ട നടപടികള്‍ സംബന്ധിച്ചും വിദഗ്‌ധ സമിതി പരിശോധിക്കും. ഇതിനായി ഒരു പൊതുമാനദണ്ഡം ഒരുക്കാനാണ് സര്‍ക്കാര്‍ ശ്രമം.
സര്‍ക്കാര്‍ ആശുപത്രിയിലും ശസ്‌ത്രക്രിയ
നിലവില്‍ സ്വകാര്യ മേഖലയിലെ ആശുപത്രികള്‍ മുഖേനയാണ് സംസ്ഥാനത്ത് ലിംഗമാറ്റ ശസ്ത്രക്രിയകള് നടന്നു വരുന്നത്. ഇതില്‍ ചികിത്സ രീതികള്‍, ചികിത്സ ചിലവ്, തുടര്‍ചികിത്സ, ഗുണനിലവാരം എന്നിവ സംബന്ധിച്ച് ഒരു ഏകീകൃത മാനദണ്ഡം ഉണ്ടാക്കും. സര്‍ക്കാര്‍ മേഖലയില്‍ ഇത്തരം ശസ്‌ത്രക്രിയകളില്‍ പ്രാവീണ്യമുള്ള ഡോക്‌ടര്‍മാര്‍ക്ക് വിദഗ്‌ധ പരിശീലനം നല്‍കി ശസ്ത്രക്രിയകള് നടത്തുന്നത് സംബന്ധിച്ചും പരിശോധിക്കും.