തിരുവനനന്തപുരം: സംസ്ഥാനത്ത് ചില ജില്ലകളിൽ ശക്തമായ മഴ തുടരുമെന്ന് കാലാവസ്ഥ നിരീക്ഷണ കേന്ദ്രം. അടുത്ത 3 മണിക്കൂറിൽ പത്തനംതിട്ട, ഇടുക്കി, കോട്ടയം ജില്ലകളിൽ ഇടിയോട് കൂടിയ അതിശക്തമായ മഴയ്ക്കും മണിക്കൂറിൽ 40 മുതൽ 60 കിലോമീറ്റർ വരെ വേഗതയിൽ വീശിയടിച്ചേക്കാവുന്ന കാറ്റിനും സാധ്യതയുണ്ടെന്നാണ് കേന്ദ്ര കാലാവസ്ഥ വകുപ്പ് അറിയിച്ചിരിക്കുന്നത്.
തിരുവനന്തപുരം, കൊല്ലം, ആലപ്പുഴ, എറണാകുളം, തൃശൂര്‍, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിൽ മണിക്കൂറിൽ 40 കിലോമീറ്റർ വരെ വേഗതയിൽ വീശിയടിച്ചേക്കാവുന്ന കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്. പല സ്ഥലങ്ങളിലും ഇന്നലെ മുതൽ ആരംഭിച്ച കനത്ത മഴ ഇന്നും തുടരുകയാണ്.
രക്ഷാപ്രവര്‍ത്തനം ഊര്‍ജ്ജിതമാക്കി
ഉരുൾപൊട്ടലുണ്ടായ മുണ്ടക്കയം കൂട്ടിക്കലിലും കൊക്കയാറിലും പുലർച്ചെയും മഴ ശക്തമാണ്. മോശം കാലവസ്ഥ കാരണം രക്ഷാപ്രവർത്തനം തടസപ്പെട്ട കൊക്കയാറിൽ രാവിലെ തന്നെ തിരച്ചിൽ തുടങ്ങി. ഫയർ ഫോഴ്‌സ്, എൻഡിആർഎഫ്, റവന്യൂ, പൊലീസ് എന്നിവരുടെ നേതൃത്വത്തിലാണ് രക്ഷാപ്രവര്‍ത്തനം നടക്കുക. കൊക്കയാറിൽ തിരച്ചിലിന് തൃപ്പുണിത്തുറ, ഇടുക്കി എന്നിവിടങ്ങളിൽ നിന്നും ഡോഗ് സ്‌ക്വാഡ് എത്തി. കൂട്ടിക്കലിൽ 40 അംഗ സൈന്യം രക്ഷാപ്രവർത്തനത്തിന് നേതൃത്വം നല്‍കുന്നുണ്ട്.
കോട്ടയം, പത്തനംതിട്ട ജില്ലകളിലാണ് മഴ ഇപ്പാഴും ശക്തമായി തുടരുന്നത്. ഏറ്റവും കൂടുതൽ നാശനഷ്‌ടവും ഈ ജില്ലകളിലാണ്. കൊല്ലത്ത് നിന്ന് അഞ്ച് ബോട്ടുകളുമായി മത്സ്യത്തൊഴിലാളികൾ പത്തനംതിട്ട ജില്ലയിൽ രക്ഷാപ്രവർത്തനത്തിനായി എത്തിയിട്ടുണ്ട്. തിരുവനന്തപുരം, കൊല്ലം ജില്ലകളിൽ രാവിലെ മുതൽ മഴ കുറഞ്ഞിട്ടുണ്ട്. എന്നാൽ മലയോര മേഖലകളിൽ പലതും ഇപ്പോൾ ഒറ്റപ്പെട്ട അവസ്ഥയിലാണ്.