തിരുവനന്തപുരം:സ്വർണക്കടത്ത് കേസിൽ തങ്ങൾ ഉന്നയിച്ച ആരോപണങ്ങൾ ശരിവയ്ക്കുന്നതാണ് സ്വപ്‌ന സുരേഷിൻ്റെ ഇപ്പോഴുള്ള വെളിപ്പെടുത്തലെന്ന് കോൺഗ്രസ് നേതാവ് രമേശ് ചെന്നിത്തല. കേസിൽ പുനരന്വേഷണം വേണമെന്നും താൻ പ്രതിപക്ഷ നേതാവായിരിക്കുമ്പോൾ ഉന്നയിച്ച ആരോപണങ്ങൾ ശരിയാണെന്ന് തെളിഞ്ഞതിൽ സന്തോഷമുണ്ടെന്നും ചെന്നിത്തല പ്രതികരിച്ചു.
നയതന്ത്ര ബാഗേജിൽ എന്താണെന്ന് ശിവശങ്കറിന് അറിയാമായിരുന്നുവെന്നും അത് വിട്ടുകെട്ടാൻ മുഖ്യമന്ത്രിയുടെ ഓഫിസ് ദുരുപയോഗപ്പെടുത്തിയെന്നും ഇതിന് മുഖ്യമന്ത്രി പിണറായി വിജയൻ മറുപടി പറയണമെന്നും ചെന്നിത്തല പ്രതികരിച്ചു. സ്‌പ്രിംഗ്ലര്‍ വിഷയത്തിൽ ശിവശങ്കറിന് വേണ്ടി പ്രതികരിച്ച മുഖ്യമന്ത്രിക്ക് മൗനം ആണോയെന്നും ചെന്നിത്തല ചോദിച്ചു.