പൊലീസുകാര്‍ക്ക് ആദരവോടെ ഒരു ചായസല്‍ക്കാരം; മാതൃകയായി ദമ്പതികള്‍

നേട്ടയം കൊമ്പനാട് വീട്ടിലെ വൈശാഖും ഭാര്യ സുമയ്യയുമാണ് ദിവസവും പൊലീസുകാര്‍ക്ക് സൗജന്യമായി ചായ നല്‍കുന്നത്.

തിരുവനന്തപുരം: വഴിമുട്ടിയ ജീവിതസാഹചര്യങ്ങൾക്കിടയിലും സാമൂഹ്യ നന്മയ്ക്ക് കാവൽ ആവു ന്ന പൊലീസുകാർക്ക് വൈകുന്നേരങ്ങളിൽ ഒരു നേരത്തെ ചായ നൽകിക്കൊണ്ട് ആദരവ് പ്രകടിപ്പിക്കുകയാണ് നെട്ടയം കൊമ്പനാടൻ വീട്ടിലെ ദമ്പതിമാരായ വൈശാഖും,സുമയ്യയും.

കഴിഞ്ഞ 43 ദിവസമായി വെയിലിലും മഴയിലും വകവയ്ക്കാതെയാണ് പൊലീസുകാർക്ക് ദിവസവും ഈ ദമ്പതികൾ ചായ എത്തിക്കുന്നത്. ലോക്ക് ഡൗണിൽ തൊഴിലില്ലാതിരിക്കേയാണ് തുശ്ചമായ വരുമാനത്തിൽ നിന്നും മിച്ചം പിടിച്ച കാശ് കൊണ്ടാണ് ഈ സേവനം നടത്തുന്നത്.

കാച്ചാണി, വഴയില, വെള്ളയമ്പലം, മരുതുംകുഴി, ഇടപ്പഴഞ്ഞി, പേരൂർക്കട, എന്നിവിടങ്ങളിൽ ഡ്യൂട്ടി ചെയ്യുന്ന പൊലീസുദ്യോഗസ്ഥർക്കാണ് ഇവർ പ്രതിഫലം വാങ്ങാതെ ചായ എത്തിക്കുന്നത്. കൊവിഡ് കാലത്ത് നിയമം നടപ്പിലാക്കുമ്പോൾ പൊതുജനം പൊലീസിനെ കുറ്റപ്പെടുത്തുന്ന സമയത്താണ് ഇവരുടെ സ്നേഹ സമ്പൂർണമായ ചായസൽക്കാരം.