തിരുവനന്തപുരം: കോണ്‍ഗ്രസുമായുള്ള അഭിപ്രായ വ്യത്യാസങ്ങളില്‍ പൂര്‍ണ വെടിനിര്‍ത്തല്‍ പ്രഖ്യാപിച്ച് യുഡിഎഫ് ഘടക കക്ഷിയായ ആര്‍എസ്‌പി. യുഡിഎഫ് കണ്‍വീനര്‍ എം.എം ഹസന്‍, കെപിസിസി പ്രസിഡന്‍റ് കെ സുധാകരന്‍, പ്രതിപക്ഷനേതാവ് വി.ഡി സതീശന്‍ എന്നിവരുമായി ആർഎസ്‌പി സംസ്ഥാന നേതൃത്വം നടത്തിയ ചര്‍ച്ചകളിലാണ് പ്രശ്‌ന പരിഹാരമായത്.
യുഡിഎഫിന്‍റെ അവിഭാജ്യ ഘടകം
ചര്‍ച്ചകള്‍ക്ക് ശേഷം കോണ്‍ഗ്രസ് നേതാക്കള്‍ക്കൊപ്പം പുറത്തു വന്ന സംസ്ഥാന സെക്രട്ടറി എ.എ ആസീസ് ചര്‍ച്ചകള്‍ സമ്പൂര്‍ണ വിജയമായിരുന്നെന്നും ആര്‍എസ്‌പി യുഡിഎഫിന്‍റെ അഭിവാജ്യ ഘടകമാണെന്നും പ്രഖ്യാപിച്ചു.
ആര്‍എസ്‌പി നേതാക്കളെ തോല്‍പ്പിക്കാന്‍ ശ്രമിച്ചവര്‍ക്കെതിരെ കര്‍ശന നടപടിയുണ്ടാകുമെന്നും അവര്‍ക്ക് പുന:സംഘടനയില്‍ ഒരു സ്ഥാനവുമുണ്ടാകില്ലെന്നും ചര്‍ച്ചകള്‍ക്ക് ശേഷം കെപിസിസി പ്രസിഡന്‍റ് കെ സുധാകരന്‍ പറഞ്ഞു. പരസ്‌പരം അഭിപ്രായ വ്യത്യാസവുമില്ലെന്നും ഒരുമിച്ചു നീങ്ങുമെന്നും അദ്ദേഹം കൂട്ടിച്ചേര്‍ത്തു.