തിരുവനന്തപുരം :സംസ്ഥാനത്ത് നടക്കുന്ന ഡിജിറ്റല്‍ റീ സര്‍വേയുടെ ഒന്നാംഘട്ടം വേഗതയില്‍ നടപ്പാക്കാന്‍ മന്ത്രിസഭാ നിര്‍ദേശം. 1550 വില്ലേജുകളുടെ ഡിജിറ്റല്‍ റീ സര്‍വെയാണ് നടക്കുന്നത്. ഈ സര്‍വേ നടപടികള്‍ വേഗത്തിലാക്കാന്‍ സര്‍വേയര്‍മാരേയും ഹെല്‍പ്പര്‍മാരേയും നിയമിക്കും.
1500 സര്‍വേയര്‍മാരേയും 3200 ഹെല്‍പ്പര്‍മാരേയുമാണ് നിയോഗിക്കുന്നത്. കരാര്‍ അടിസ്ഥാനത്തില്‍ എംപ്ലോയ്‌മെന്‍റ് എക്‌സ്‌ചേഞ്ച് വഴിയാകും നിയമനം.
തീരദേശ പ്ലാന്‍ ; സമിതി റിപ്പോര്‍ട്ട് തത്വത്തില്‍ അംഗീകരിച്ചു :തീരദേശ പരിപാലന പ്ലാന്‍ പരിശോധിച്ച് അപാകതകള്‍ പരിഹരിക്കുന്നതിന് രൂപീകരിച്ച വിദഗ്‌ധ സമിതി റിപ്പോര്‍ട്ട് തത്വത്തില്‍ അംഗീകരിച്ചു. കേന്ദ്രസര്‍ക്കാര്‍ പുറപ്പെടുവിച്ച തീരദേശ നിയന്ത്രണ മേഖലാ വിജ്ഞാപനം 2019നെ തുടര്‍ന്ന് തയാറാക്കിയ കരട് പ്ലാനിലെ അപാകതകള്‍ പരിശോധിച്ച റിപ്പോര്‍ട്ടാണിത്.
ദുരിതാശ്വാസ നിധിയില്‍ നിന്ന് സഹായം :തിരുവനന്തപുരം കടംകംപള്ളി വില്ലേജില്‍ കടല്‍ പുറംപോക്കില്‍ താമസിച്ചുവരവെ 2018ലെ പ്രളയത്തില്‍ പൂര്‍ണമായും വീട് തകര്‍ന്ന ലൂര്‍ദ്ദിന് രണ്ട് സെന്‍റ് സ്ഥലവും വീടും വാങ്ങുന്നതിന് മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് 7,04,900 രൂപ അനുവദിച്ചു.
മില്ലറ്റ് ഫാം തുടങ്ങുന്നതിന് ഭൂമി കൈമാറും :പാലക്കാട് ജില്ലയിലെ അഗളി വില്ലേജില്‍ മൃഗസംരക്ഷണ വകുപ്പിന്‍റെ കീഴിലുള്ള അഞ്ചേക്കര്‍ സ്ഥലം മില്ലറ്റ് ഫാം തുടങ്ങാന്‍ കൃഷി വകുപ്പിന് കൈമാറും. ഭൂമിയുടെ ഉടമസ്ഥാവകാശം റവന്യൂ വകുപ്പില്‍ നിലനിര്‍ത്തി നിബന്ധനകള്‍ക്ക് വിധേയമായാണ് കൈമാറുക.
കരട് ഓര്‍ഡിനന്‍സ് :തദ്ദേശ സ്വയംഭരണ പൊതുസര്‍വീസ് രൂപീകരിക്കുന്നതിന് കേരള തദ്ദേശ സ്വയംഭരണ സ്ഥാപനങ്ങള്‍ നിയമങ്ങളും മറ്റ് നിയമങ്ങളും (ഭേദഗതി) ഓര്‍ഡിനന്‍സിന്‍റെ കരടിന് മന്ത്രിസഭായോഗം അംഗീകാരം നല്‍കി. കരട് ഓര്‍ഡിനന്‍സ് പുറപ്പെടുവിക്കുന്നതിന് ഗവര്‍ണറോട് ശുപാര്‍ശ ചെയ്യാന്‍ തീരുമാനിച്ചു.
ഭരണാനുമതി നല്‍കും :കേരള യൂണിവേഴ്‌സിറ്റി ഓഫ് ഡിജിറ്റല്‍ സയന്‍സ്, ഇന്നൊവേഷന്‍ ആൻഡ് ടെക്‌നോളജി കാമ്പസില്‍ സ്റ്റേറ്റ് ഡാറ്റ സെന്‍റർ വിത്ത് ഹൈബ്രിഡ് ക്ലൗഡ് കോംപിറ്റബിള്‍ ആൻഡ് ഹൈപ്പര്‍ കണ്‍വേര്‍ജ്‌ഡ് ഇന്‍ഫ്രാസ്‌ട്രക്‌ചർ സ്ഥാപിക്കുന്നതിന് ഭരണാനുമതി നല്‍കും. 25 കോടി രൂപ ചെലവിലാണ് സ്ഥാപിക്കുക. പ്രാഥമിക ആവശ്യത്തിനുള്ള 7 കോടി രൂപ കേരള സ്റ്റേറ്റ് ഐടി ഇന്‍ഫ്രാസ്ട്രക്ചറിന്‍റെ കീഴിലുള്ള സ്‌കില്‍ ഡെലിവറി പ്ലാറ്റ്‌ഫോമില്‍ നിന്നും ഐ.ടി മിഷന് അനുവദിക്കും.
ശമ്പളപരിഷ്‌കരണം :കേരള ആരോഗ്യ ശാസ്ത്ര സര്‍വകലാശാലയിലെ യു.ജി.സി സ്‌കീമില്‍പ്പെടുന്ന ഉദ്യോഗസ്ഥരുടെ ശമ്പളം പരിഷ്‌കരിക്കും. കുടിശ്ശികയുടെ കാര്യം പിന്നീട് തീരുമാനിക്കും. കേരള മോട്ടോര്‍ തൊഴിലാളി ക്ഷേമനിധി ബോര്‍ഡില്‍ ശമ്പള പരിഷ്‌കരണം, സര്‍ക്കാര്‍ അംഗീകാരമുള്ള തസ്തികകളിലെ ജീവനക്കാരുടെ ശമ്പളം, അലവന്‍സുകള്‍ മറ്റ് ആനുകൂല്യങ്ങള്‍ എന്നിവ 11-ാം ശമ്പള പരിഷ്‌കരണ ഉത്തരവിലെ നിബന്ധനകള്‍ പ്രകാരം പരിഷ്‌കരിക്കും.
ALSO READ:'കെ സുധാകരൻ ക്രിമിനൽ രാഷ്‌ട്രീയത്തെ ന്യായീകരിക്കുന്ന നേതാവ്' ; പ്രതിപക്ഷ സമരം പരിഹാസ്യമെന്ന് എ വിജയരാഘവൻ
