തിരുവനന്തപുരം:കെ.എം.മാണി ബജറ്റ് അവതരിപ്പിക്കുന്നത് തടസപ്പെടുത്താൻ 2015 മാര്‍ച്ച് 13ന് കേരള നിയമസഭയിലുണ്ടായ അക്രമസംഭവങ്ങളില്‍ 2.5 ലക്ഷം രൂപയുടെ പൊതുമുതല്‍ നശിപ്പിക്കപ്പെട്ടുവെന്നാണ് ക്രൈം ബ്രാഞ്ച് കേസ്. നിയമസഭ സെക്രട്ടറിയുടെ പരാതിയെ തുടര്‍ന്ന് മ്യൂസിയം പൊലീസാണ് എഫ്.ഐ.ആര്‍ തയാറാക്കിയത്. കേസ് അന്വേഷണം പിന്നീട് ക്രൈം ബ്രാഞ്ചിന് കൈമാറി.
തിരുവനന്തപുരം സി.ജെ.എം കോടതിയില്‍ ക്രൈം ബ്രാഞ്ച് സമര്‍പ്പിച്ച കുറ്റപത്രത്തിന്‍റെ അടിസ്ഥാനത്തിലാണ് വിചാരണ ആരംഭിച്ചത്. ഒന്നാം പിണറായി സര്‍ക്കാരിന്‍റെ കാലത്ത് വിചാരണ ആരംഭിക്കുമ്പോള്‍ കേസില്‍ പ്രതികളായിരുന്ന ഇ.പി. ജയരാജനും കെ.ടി ജലീലും മന്ത്രിമാരായിരുന്നു. കേസില്‍ ജാമ്യമെടുത്തതിന് പിന്നാലെ കേസ് പിന്‍വലിക്കണമെന്നാവശ്യപ്പെട്ട് സര്‍ക്കാര്‍ സി.ജെ.എം കോടതിയെ സമീപിച്ചു.
ഇതിനെതിരെ അന്നത്തെ പ്രതിപക്ഷ നേതാവ് രമേശ് ചെന്നിത്തല തടസ ഹര്‍ജി നല്‍കി. കേസ് പിന്‍വലിക്കാനാകില്ലെന്നും പ്രതികള്‍ വിചാരണ നേരിടണമെന്നും സി.ജെ.എം കോടതി വിധിച്ചു. സി.ജെ.എം കോടതി വിധിക്കെതിരെ ഹൈക്കോടതിയെ സമീപിച്ചെങ്കിലും കീഴ്‌ക്കോടതി വിധി ശരിവയ്ക്കുകയാണ് ഹൈക്കോടതി ചെയ്തത്. ഇതിനെതിരെ സുപ്രീംകോടതിയില്‍ സമര്‍പ്പിച്ച അപ്പീലാണ് ഇപ്പോള്‍ ജസ്റ്റീസ് ബി.വൈ. ചന്ദ്രചൂഡ് തള്ളിയിരിക്കുന്നത്.