പാലക്കാട്: പനിയും ഛർദ്ദിയും മൂർച്ഛിച്ചതിനെ തുടർന്ന് തൃശൂർ മെഡിക്കൽ കോളജിലേക്ക് റഫർ ചെയ്‌ത അഞ്ചു വയസുകാരി യാത്രാമധ്യേ മരിച്ചു. പുതൂർ മേലെ മുള്ളി ഊര് സ്വദേശികളായ കുമാറിന്‍റെയും സീതയുടെയും മകൾ ഷീജയാണ് മരിച്ചത്. ഞായറാഴ്‌ച രാവിലെ പനിയും ഛർദ്ദിയും വയറിളക്കവും ആറോ ഏഴോ തവണ അപസ്‌മാരവും വന്ന സാഹചര്യത്തിൽ ആശുപത്രിയിൽ ചികിത്സ തേടുകയായിരുന്നു.
ആദ്യം അഗളിയിലെ സ്വകാര്യ ആശുപത്രിയിലും പ്രവേശിപ്പിച്ച കുട്ടിയെ തുടർന്ന് കോട്ടത്തറ ട്രൈബൽ സ്പെഷ്യാലിറ്റി ആശുപത്രിയിലേക്കും റഫർ ചെയ്‌തു. ആശുപത്രിയിൽ വച്ചും അപസ്‌മാരം വരികയും പനി കൂടുകയും ചെയ്‌ത സാഹചര്യത്തിലാണ് തൃശൂർ മെഡിക്കൽ കോളജിലേക്ക് മാറ്റാൻ ശ്രമിച്ചത്. എന്നാൽ യാത്രാമധ്യേ കുട്ടിയുടെ ആരോഗ്യനില വീണ്ടും വഷളായതിനെ തുടർന്ന് തിരികെ കോട്ടത്തറ ആശുപത്രിയിലേക്ക് തിരികെയെത്തിക്കാൻ ശ്രമിച്ചു. എന്നാൽ ആശുപത്രിയിൽ എത്തുന്നതിന് മുമ്പേ കുഞ്ഞ് മരിക്കുകയായിരുന്നു.