പാലക്കാട്: കുടിവെള്ളത്തിനായി കിലോമീറ്ററുകൾ താണ്ടുന്ന കീരിപ്പതി ഊര് നിവാസികളുടെ ദുരിതത്തിന് വിരാമം. അഗളി സ്വാമി വിവേകാനന്ദ മെഡിക്കൽ മിഷന്‍റെ നേതൃത്വത്തില്‍ ഊരില്‍ കുഴല്‍ കിണർ സ്ഥാപിച്ചതോടെ ഇനി കുടിവെള്ളത്തിനായി ഊര് നിവാസികള്‍ക്ക് അലയേണ്ടി വരില്ല.
കുടിവെള്ള ക്ഷാമം രൂക്ഷം
അട്ടപ്പാടിയിലെ തന്നെ ഏറ്റവും വരണ്ട മേഖലകളിൽ ഒന്നാണ് ഷോളയൂർ പഞ്ചായത്തിലെ കീരിപ്പതി. മഴക്കാലത്ത് പോലും ഇവിടെ കുടിവെള്ളമെന്നത് കിട്ടാക്കനിയാണ്. ഊരിൽ നിന്നും മൂന്ന് കിലോമീറ്റർ കാട്ടിലൂടെ നടന്നാലാണ് ഒരു ചെറിയ നീരുറവ ഉള്ളത്. വേനൽക്കാലമായാൽ അതും നിലക്കും.
വന്യമൃഗശല്യം രൂക്ഷമായ വനത്തിലൂടെ കുത്തനെ ഉള്ള കയറ്റത്തിലൂടെ കുടിവെള്ളം ചുമന്ന് കൊണ്ട് വരുന്നത് വളരെയധികം ബുദ്ധിമുട്ട് സൃഷ്‌ടിച്ചിരുന്നു. മുപ്പതിൽ അധികം കുടുംബങ്ങളാണ് ഇപ്പോള്‍ ഊരിലുള്ളത്. കുടിവെള്ള ക്ഷാമം രൂക്ഷമായതിനാൽ പലരും ഊര് ഉപേക്ഷിച്ച് പലായനം ചെയ്‌തു.