പാലക്കാട്: ആരോഗ്യമേഖലയുടെ കാലാനുസൃതമായ മുന്നേറ്റത്തിനു വേണ്ടി രൂപീകരിച്ച ആര്‍ദ്രം പദ്ധതിയിലൂടെ പ്രാഥമികാരോഗ്യ കേന്ദ്രങ്ങള്‍ മുതല്‍ മെഡിക്കല്‍ കോളജുകള്‍ വരെ മികച്ച മുന്നേറ്റം ഉണ്ടാക്കിയതായി മുഖ്യമന്ത്രി പിണറായി വിജയന്‍. ആരോഗ്യ മേഖലയില്‍ പാലക്കാട് ജില്ലയില്‍ അഞ്ചെണ്ണം ഉള്‍പ്പെടെ സംസ്ഥാനത്ത് നടപ്പിലാക്കുന്ന 34 പദ്ധതികളുടെ ഉദ്ഘാടനം ഓണ്‍ലൈനായി നിര്‍വഹിച്ച് സംസാരിക്കുകയായിരുന്നു അദ്ദേഹം.
2071.33 കോടിയുടെ കിഫ്ബി ഫണ്ട് ഉപയോഗിച്ചാണ് പദ്ധതികള്‍ നടപ്പാക്കുന്നത്. ജനറല്‍ ആശുപത്രി, താലൂക്ക് ആശുപത്രി എന്നിവയില്‍ കെട്ടിടങ്ങള്‍, ട്രോമാകെയര്‍ സെന്‍ററുകള്‍, ഡയാലിസിസ് യൂണിറ്റുകള്‍ എന്നിവയുടെ ഉദ്ഘാടനവും നവീകരണവും മുഖ്യമന്ത്രി നിര്‍വഹിച്ചു. പാലക്കാട് ജില്ലാ ആശുപത്രിയുടെ സമഗ്രവികസനത്തിന് 79.38 കോടിയും പട്ടാമ്പി താലൂക്ക് ആശുപത്രിയിലെ പുതിയ ആശുപത്രി കോംപ്ലക്‌സിനായി 9.9 കോടിയും ആലത്തൂര്‍ താലൂക്ക് ആശുപത്രിയുടെ പുതിയ കെട്ടിടത്തിനായി 11.04 കോടിയും മണ്ണാര്‍ക്കാട് താലൂക്ക് ആശുപത്രിയുടെ പുതിയ കെട്ടിടത്തിനായി 10.47 കോടിയും ഒറ്റപ്പാലം താലൂക്ക് ആശുപത്രിയുടെ പുതിയ കെട്ടിടത്തിലായി 11.35 കോടിയുമാണ് കിഫ്ബി അനുവദിച്ചിരിക്കുന്നത്. ഈ പദ്ധതികളുടെ പ്രവൃത്തി ഉദ്ഘാടനം മുഖ്യമന്ത്രി നിര്‍വഹിച്ചു. ആരോഗ്യ വകുപ്പ് മന്ത്രി കെ.കെ ശൈലജ ടീച്ചര്‍ അധ്യക്ഷയായി.
ജില്ലക്ക് ആരോഗ്യമേഖലയില്‍ അനുവദിക്കപ്പെട്ട കിഫ്ബി പദ്ധതികള്‍
ജില്ലയിലെ അഞ്ച് ആശുപത്രികളുടെ നവീകരണത്തിനും വികസനത്തിനുമായി കിഫ്ബിയില്‍ നിന്നും 122.14 കോടി രൂപ അനുവദിച്ചു. പാലക്കാട് ജില്ലാ ആശുപത്രി, ആലത്തൂര്‍, ഒറ്റപ്പാലം, മണ്ണാര്‍ക്കാട്, പട്ടാമ്പി താലൂക്ക് ആസ്ഥാന ആശുപത്രികള്‍ എന്നിവയുടെ സമഗ്ര വികസനത്തിലൂന്നിയുള്ള നിര്‍മ്മാണ പ്രവര്‍ത്തനങ്ങള്‍ക്കായാണ് കിഫ്ബിയില്‍ അനുമതിയായിരിക്കുന്നത്.