മലപ്പുറം: പാണ്ടിക്കാട് നിർത്തിയിട്ട ബൈക്കിൽ നിന്ന് 20 ലക്ഷം രൂപയുടെ സ്വർണം കവര്‍ന്ന കേസിൽ മുഴുവൻ പ്രതികളും പൊലീസ് പിടിയിൽ. പോരൂർ അയനിക്കോട് സ്വദേശി പടിഞ്ഞാറയിൽ ജയപ്രകാശ്, എടവണ്ണ പന്നിപ്പാറ സ്വദേശി ഷിഹാബ്, കുന്നുമ്മൽ സ്വദേശി പാലപറ്റ പ്രജിത്ത് എന്നിവരെയാണ് പൊലീസ് അറസ്റ്റ് ചെയ്‌തത്. ഇതോടെ കേസിലെ മുഴുവൻ പ്രതികളും പിടിയിലായി.
ഡിസംബർ 15നാണ് കേസിനാസ്‌പദമായ സംഭവം. പാണ്ടിക്കാട് ടൗണിലെ സ്വർണ ശുദ്ധീകരണ സ്ഥാപനത്തിലെ തൊഴിലാളിയായ കിഷോർ ശുദ്ധീകരിച്ച 400 ഗ്രാമോളം വരുന്ന സ്വർണവുമായി ഒറവംപുറത്തെ താമസ സ്ഥലത്തേക്ക് പുറപ്പെടുകയും വഴിമധ്യേ സാധനങ്ങൾ വാങ്ങാൻ കടയിൽ കയറുകയും ചെയ്തു. ഈ തക്കത്തിന്, ബൈക്കിലുണ്ടായിരുന്ന സ്വർണാഭരണങ്ങൾ പ്രതികള്‍ മോഷ്‌ടിക്കുകയായിരുന്നു.
ബൈക്കിൽ നിന്ന് 20 ലക്ഷത്തിന്‍റെ സ്വർണം കവര്‍ന്ന സംഭവം ; പ്രതികള്‍ പിടിയിൽ