തിരുവനന്തപുരം: മലയാളം സർവകലാശാലയ്ക്ക് സ്ഥലം ഏറ്റെടുക്കുന്നതിൽ അഴിമതിയാരോപണവുമായി പ്രതിപക്ഷം നിയമസഭയിൽ. സ്ഥലമേറ്റെടുപ്പിൽ വൻ അഴിമതിയുണ്ടെന്നും ക്രമക്കേട് സംബന്ധിച്ച് ചർച്ച ചെയ്യണമെന്നും ആവശ്യപ്പെട്ട് സി. മമ്മൂട്ടിയാണ് അടിയന്തര പ്രമേയത്തിന് അവതരണാനുമതി തേടി നിയമസഭയിൽ നോട്ടീസ് നൽകിയത്.
സ്ഥലമേറ്റെടുപ്പിലെ അഴിമതിയിൽ മന്ത്രി കെ.ടി ജലീലിന്‍റെ പങ്ക് അന്വേഷിക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. അതേസമയം, സ്ഥലമേറ്റെടുപ്പ് നടപടികളിൽ ഭൂരിഭാഗവും പൂർത്തിയാക്കിയത് യുഡിഎഫിന്‍റെ ഭരണകാലത്താണെന്നും നിലവിലെ സർക്കാരിനോ മന്ത്രിമാർക്കോ ഇടപാടിൽ പങ്കില്ലെന്നും മന്ത്രി കെ.ടി ജലീൽ വിശദീകരിച്ചു.
എന്നാൽ അടിയന്തര പ്രാധാന്യമുള്ള വിഷയമായി ആവശ്യം പരിഗണിക്കാനാവില്ലെന്ന് സ്പീക്കർ നിലപാട് സ്വീകരിച്ചു. ഇതു സംബന്ധിച്ച് ഉത്തരവ് പുറത്തിറങ്ങിയത് ഈ മാസമാണെന്നും ഇടപാടിൽ കോടികളുടെ അഴിമതിയുണ്ടെന്നും വിഷയം സഭയിൽ ചർച്ച ചെയ്യണമെന്നും പ്രതിപക്ഷ നേതാവ് രമേശ് ചെന്നിത്തല ആവശ്യമറിയിച്ചു. നിലപാട് വ്യക്തമാക്കി സ്പീക്കർ മറ്റ് സഭാനടപടികളിലേക്ക് കടന്നതോടെ പ്രതിപക്ഷം നടുത്തളത്തിലിറങ്ങി പ്രതിഷേധിക്കുകയും വിഷയം ചർച്ചയ്ക്കെടുക്കാൻ സർക്കാരിന് ഭയമാണെന്ന് കുറ്റപ്പെടുത്തി പ്രതിപക്ഷം സഭയിൽ നിന്നും ഇറങ്ങിപ്പോകുകയും ചെയ്തു. എന്നാൽ, കമ്മീഷൻ ലഭിക്കാത്ത ചിലരാണ് സ്ഥലമേറ്റെടുപ്പ് മുടക്കാൻ ശ്രമിക്കുന്നതെന്ന് കെ.ടി.ജലീൽ തിരിച്ചടിച്ചു.
