കെ റെയിൽ കേരളത്തെ വിഭജിക്കും, സർക്കാരിന് ഹിഡൺ അജണ്ട: ഇ.ശ്രീധരൻ

സിൽവർ ലൈനിൽ മുഖ്യമന്ത്രി പിടിവാശി കാണിക്കുന്നുവെന്ന് ഇ.ശ്രീധരൻ.

മലപ്പുറം: കെ റെയിൽ കേരളത്തെ വിഭജിക്കില്ലെന്ന മുഖ്യമന്ത്രി പിണറായി വിജയന്‍റെ വാദം തള്ളി മെട്രോമാൻ ഇ.ശ്രീധരൻ. കെ റെയിലിനായി 393 കിലോമീറ്റർ ഭിത്തി കെട്ടേണ്ടിവരും. സിൽവർ ലൈനിൽ മുഖ്യമന്ത്രി പിടിവാശി കാണിക്കുന്നു. നാടിന് ആവശ്യമുള്ള പദ്ധതികൾ ചെയ്യാതെ സിൽവർ ലൈനുമായി മുന്നോട്ട് പോകുന്നത് പദ്ധതിയിൽ സർക്കാരിന് ഹിഡൻ അജണ്ട ഉള്ളതുകൊണ്ടാണെന്നും ഇ.ശ്രീധരൻ മാധ്യമങ്ങളോട് പറഞ്ഞു.

നിലത്ത് കൂടിയുള്ള അതിവേഗ പാതയ്ക്ക് കേരളം യോജ്യമല്ല. ആകാശപാതയാണ് കേരളത്തിന് അനുയോജ്യം. റെയിൽവേ പദ്ധതി കേന്ദ്ര സർക്കാരിൻ്റെ അനുമതിയില്ലാതെ നടപ്പാക്കാനാവില്ല. കേന്ദ്ര സർക്കാർ അനുമതി നൽകുമെന്ന് തോന്നുന്നില്ല. പദ്ധതിയുടെ ദോഷവശങ്ങൾ പ്രധാനമന്ത്രിയുടെ ശ്രദ്ധയിൽപ്പെടുത്തിയിട്ടുണ്ടെന്നും ഇ. ശ്രീധരൻ പറഞ്ഞു.

ഉദ്യോഗസ്ഥർ വേണ്ട വിധം മുഖ്യമന്ത്രിയെ കാര്യങ്ങൾ ധരിപ്പിക്കുന്നില്ല. പദ്ധതി മൂലം മുഖ്യമന്ത്രി ഒറ്റപ്പെടും. അത്തരം അവസ്ഥ വന്നാൽ മുഖ്യമന്ത്രി ഉദ്യോഗസ്ഥരെ പഴിചാരി രക്ഷപെടും. അഞ്ചു വർഷം കൊണ്ട് കെ റെയിൽ ഒരിക്കലും പൂർത്തിയാവില്ല. ഇത്രയും വിവരമില്ലാത്ത ആളുകളെന്നത് അത്ഭുതപ്പെടുത്തുന്നുവെന്നും അദ്ദേഹം പറഞ്ഞു.

മുഖ്യമന്ത്രി വിളിച്ചാൽ പദ്ധതി എങ്ങനെ, എപ്പോൾ എന്നതടക്കം വിശദമായി പറഞ്ഞു കൊടുക്കാൻ തയാറാണെന്നും എന്നാൽ അദ്ദേഹം വിളിക്കുമെന്ന് തോന്നുന്നില്ലെന്നും ശ്രീധരൻ മാധ്യമങ്ങളെ അറിയിച്ചു.