കോഴിക്കോട്:ഓണക്കാലത്ത് താരങ്ങളായി നടക്കുന്ന ആൺ മാവേലികൾക്ക് വെല്ലുവിളിയായി ഇവിടെ പെൺ മാവേലി രംഗത്തിറങ്ങിയിട്ടുണ്ട്. കുടവയറുള്ള പുരുഷന്മാർ മാത്രം കുത്തകയാക്കിയ മാവേലി വേഷമാണ്‌ നടുവണ്ണൂർ കോട്ടൂർ നല്ലാശ്ശേരി സുനിത മനോഹരമാക്കിയത്‌. കുടുംബശ്രീ ഹോം ഷോപ്പ് കോട്ടൂർ പഞ്ചായത്തിൽ സംഘടിപ്പിച്ച 'അത്തപ്പൂമഴ' പരിപാടിയിലാണ് സുനിത മാവേലി പ്രജകളുടെ ക്ഷേമം അന്വേഷിച്ചതും അനുഗ്രഹം ചൊരിഞ്ഞതും.
ഓണത്തിന് പൊതു സമൂഹത്തിന് ഒരു തിരുത്ത്: രാജകീയ പ്രൗഡിയിൽ മാസ് എൻട്രിയിൽ പെൺ മാവേലി
വേഷഭൂഷാദികളും കൊമ്പന്‍ മീശയും കിരീടവും ഓലക്കുടയുമെല്ലാമായി സുനിത രംഗത്തിറങ്ങിയപ്പോൾ ആദ്യം ആർക്കും പിടികിട്ടിയില്ല. കാൽവിരലിലെ ക്യൂട്ടക്‌സ് കണ്ടതോടെയാണ് ആളുകൾ തിരിച്ചറിഞ്ഞത്. തങ്ങളുടെ മുന്നിലുള്ള മാവേലി വനിതയാണെന്ന് അറിഞ്ഞതോടെ കാഴ്‌ചക്കാര്‍ക്കും അത് കൗതുകമായി. പിന്നാലെ കുശലാന്വേഷണവും സെൽഫിയെടുക്കലുമായി.