വാവ സുരേഷിന് മൂർഖന്‍റെ കടിയേറ്റു; തീവ്രപരിചരണ വിഭാഗത്തില്‍

മൂർഖനെ പിടികൂടുന്നതിനിടെ വലതുകാലിൽ വാവ സുരേഷിന് കടിയേറ്റത്.

കോട്ടയം:കുറിച്ചിയിൽ വച്ച് വാവ സുരേഷിന് മൂർഖന്‍റെ കടിയേറ്റു. പാമ്പിനെ പിടിക്കുന്നതിനിടെയാണ് വലതുകാലിൽ വാവ സുരേഷിന് കടിയേറ്റത്. തിങ്കളാഴ്‌ച വൈകിട്ട് നാലരയോടെയാണ് സംഭവം. മൂന്നു ദിവസമായി പ്രദേശത്ത് കണ്ടുവന്ന പാമ്പിനെ പിടിക്കാൻ എത്തിയതായിരുന്നു വാവ സുരേഷ്. പാമ്പിനെ ചാക്കിനുള്ളിൽ കയറ്റുന്നതിനിടെ പെട്ടെന്ന് കടിയേൽക്കുകയായിരുന്നു.

പാമ്പിന്‍റെ കടിയേറ്റ് അബോധാവസ്ഥയിലായ വാവ സുരേഷിനെ കോട്ടയം ഭാരത് ആശുപത്രിയിൽ പ്രവേശിപ്പിച്ചു. ആശുപത്രിയിൽ എത്തിയപ്പോൾ തന്നെ വാവ സുരേഷ് ബോധരഹിതനായിരുന്നതായി ഭാരത് ആശുപത്രി എം ഡി വിനോദ് വിശ്വനാഥൻ അറിയിച്ചു. തുടർന്ന് കോട്ടയം മെഡിക്കൽ കോളജ് മെഡിക്കൽ തീവ്രപരിചരണ വിഭാഗത്തിലേക്ക് മാറ്റുകയായിരുന്നു.