കോട്ടയം:കോട്ടയം ബിസിഎം കോളജ് കെട്ടിടത്തിൽ നിന്നും ചാടിയ വിദ്യാർഥിനി മരിച്ചു. മൂന്നാം വർഷ ബിരുദ വിദ്യാർഥിയായ പന്തളം സ്വദേശി ദേവികയാണ് (21) മരിച്ചത്. കോട്ടയം മെഡിക്കൽ കോളജ് ആശുപത്രിയിൽ ചികിത്സയിലിരിക്കെ ഇന്ന്‌ രാവിലെയാണ് ദേവിക മരിച്ചത്.
ജൂലൈ 11ന് രാവിലെ 11.30ഓടെയാണ് വിദ്യാർഥിനി കോളജ് കെട്ടിടത്തിന്‍റെ ഒന്നാം നിലയിൽ നിന്ന് ചാടിയത്. പരിക്കുകളോടെ വിദ്യാർഥിനിയെ കോട്ടയം മെഡിക്കൽ കോളജ് ആശുപത്രിയില്‍ പ്രവേശിപ്പിക്കുകയായിരുന്നു. ദേവിക മാനസിക വിഷമത്തിലായിരുന്നുവെന്നാണ് സഹപാഠികളും കോളജ് അധികൃതരും പറയുന്നത്. സ്വമേധയ ചാടുകയായിരുന്നുവെന്ന് ചികിത്സയിലിരിക്കെ ദേവിക കോട്ടയം വെസ്റ്റ് പൊലീസിന് മൊഴി നൽകിയിരുന്നു.