ലോകസഭയിലേക്ക് മത്സരിക്കാൻ പി സി ജോർജും; 19 മണ്ഡലങ്ങളിലും ജനപക്ഷത്തിന് സ്ഥാനാർഥികള്‍

പത്തനംതിട്ടയിൽ സ്ഥാനാർഥിയാകാനാണ് പിസി ജോർജിന്‍റെ തീരുമാനം. മകൻ ഷോണ്‍ ജോർജും മത്സരിച്ചേക്കും. കോട്ടയത്ത് പിജെ ജോസഫ് എങ്കിൽ പിന്തുണക്കും

19 പാർലമെന്‍റ് മണ്ഡലങ്ങളിൽ കേരള ജനപക്ഷം ഒറ്റക്ക് മത്സരിക്കുമെന്ന് പാര്‍ട്ടി ചെയർമാൻ പിസി ജോർജ്. കോട്ടയം മണ്ഡലത്തിൽ പിജെ ജോസഫ് മത്സരിക്കുകയാണെങ്കിൽ പിന്തുണക്കുമെന്നും പത്തനംതിട്ടയിൽ പാർട്ടി ആവശ്യപ്രകാരം താൻ തന്നെ സ്ഥാനാർഥിയാകുമെന്നും അദ്ദേഹം പറഞ്ഞു. മൂന്ന് മണ്ഡലങ്ങളിൽ വിജയവും മറ്റു മണ്ഡലങ്ങളിൽ ശക്തി തെളിയിക്കലാണ് ലക്ഷ്യമെന്നും പിസി ജോർജ് വ്യക്തമാക്കി.

കോൺഗ്രസുമായി സഹകരിക്കാൻ സന്നദ്ധത അറിയിച്ച് കത്ത് നൽകിയിട്ട് നാളിതുവരെ മറുപടി ഒന്നും ലഭിക്കാത്ത സാഹചര്യത്തിലാണ് പാർട്ടിയുടെ ശക്തി തെളിയിക്കാൻ കേരള ജനപക്ഷം ഒറ്റക്ക് മത്സര രംഗത്തേക്ക് ഇറങ്ങുന്നത്. ഇന്ന് ചേർന്ന സംസ്ഥാന കമ്മറ്റിയാണ് ഇതു സംബന്ധിച്ച തീരുമാനമെടുത്തത്. കോട്ടയം മണ്ഡലത്തിൽ പിജെ ജോസഫ് മത്സരിച്ചാൽ പിന്തുണക്കും. മറ്റ് 19 മണ്ഡലങ്ങളിലും പാർട്ടിയുടെ സ്വന്തം സ്ഥാനാർഥികൾ മത്സരിക്കും. പത്തനംതിട്ട, തിരുവനന്തപുരം. ചാലക്കുടി മണ്ഡലങ്ങളിൽ വിജയം തന്നെയാണ് പാർട്ടി ലക്ഷ്യം. മറ്റ് മണ്ഡലങ്ങളിൽ ജനപക്ഷത്തിന്‍റെ ശക്തി തെളിയിക്കും. പിസി ജോർജ് പറഞ്ഞു

പത്തനംതിട്ടയിൽ താൻ തന്നെയാകും മത്സരരംഗത്ത്. മറ്റ് മണ്ഡലങ്ങളിൽ സ്ഥാനാർഥികളെ കണ്ടെത്താൻ ഒമ്പത് അംഗ കമ്മറ്റിയെ ചുമതലപ്പെടുത്തിയിട്ടുണ്ട്. രണ്ടു ദിവസത്തിനുള്ളിൽ മുഴുവൻ സ്ഥാനാർഥികളെയും പ്രഖ്യാപിക്കും. മകൻ ഷോൺ ജോർജിന്‍റെ പേരും കമ്മറ്റിയിൽ നിന്ന് ഉയർന്നുവരുന്നുണ്ട്. എന്നാൽ എവിടെ മത്സരിക്കുമെന്ന കാര്യത്തിൽ തീരുമാനമായിട്ടില്ല.

ക്രൈസ്തവസഭകളുടെ സ്വത്തുക്കൾ കൈക്കലാക്കാനുള്ള നീക്കമാണ് ജസ്റ്റിസ് കെ ടി തോമസിനെ വച്ച് ഇടതുസർക്കാർ നടപ്പാക്കുന്നതെന്നും വിശ്വാസത്തെ തകർക്കുന്ന നീക്കത്തിൽ നിന്ന് സർക്കാർ പിന്മാറണമെന്നും പിസി ജോർജ് ആവശ്യപ്പെട്ടു. സർഫാസി ആക്ടിനെതിരെ 11ന് കോട്ടയത്ത് ജനപക്ഷം ഉപവാസം സംഘടിപ്പിക്കും. ഇരുപതിനായിരത്തോളം പേർക്കാണ് സർഫാസി ആക്ട് പ്രകാരം ജപ്തി നോട്ടീസ് അയച്ചിരിക്കുന്നത്. ആറുമാസം മോറട്ടോറിയം പ്രഖ്യാപിച്ച മുഖ്യമന്ത്രിയുടെ പ്രസ്താവന ജനങ്ങളുടെ കണ്ണിൽ പൊടിയിടൽ ആണെന്നും ജോർജ് ആരോപിച്ചു.