കോട്ടയം:സ്വര്‍ണക്കടയില്‍ നിന്നും മാല എടുത്ത് ഓടിയ മോഷ്‌ടാവ് പൊലീസ് പിടിയില്‍. കർണാടക കുടക് സ്വദേശി റിച്ചാർഡ് കെ.എസിനെയാണ് (23) ബെംഗളൂരുവില്‍ നിന്നും ചങ്ങനാശ്ശേരി പൊലീസ് അറസ്റ്റ് ചെയ്‌തത്. ചങ്ങനാശ്ശേരി സെൻട്രൽ ജങ്‌ഷനിലുളള ആലുക്കൽ ജ്വല്ലറിയിൽ നിന്നും രണ്ട് പവൻ തൂക്കം വരുന്ന സ്വർണമാലയാണ് പ്രതി കവര്‍ന്നത്.
ഞായറാഴ്‌ച(24.07.2022) പകല്‍ രണ്ട് പവന്‍റെ മാല വാങ്ങാനെന്ന വ്യാജേന ജ്വല്ലറിയില്‍ എത്തിയ പ്രതി ചെയിൻ വേണമെന്ന് ആവശ്യപ്പെട്ടു. കടയുടമ അതെടുക്കാനായി തിരിഞ്ഞപ്പോള്‍ കൈയ്യിലിരുന്ന മാലയുമായി പ്രതി കടയിൽ നിന്നും ഇറങ്ങിയോടുകയായിരുന്നു. തുടര്‍ന്ന് സ്വര്‍ണമാല സ്വകാര്യ പണമിടപാട് സ്ഥാപനത്തിൽ പണയം വച്ച് ലഭിച്ച പണവുമായി ഇയാള്‍ ബെംഗളൂരിലേക്ക് കടന്നുകളഞ്ഞു.