കെവിൻ വധം; പ്രതികളുടെ ജാമ്യാപേക്ഷ തള്ളി
അഞ്ച് പ്രതികളുടെ ജാമ്യപേക്ഷയാണ് കോടതി തള്ളിയത്. കോട്ടയം പ്രിന്‍സിപ്പല്‍ സെഷന്‍സ് കോടതിയാണ് കേസ് പരിഗണിക്കുന്നത്
കെവിൻ
കെവിൻ വധക്കേസിൽ പ്രതികളുടെ ജാമ്യാപേക്ഷ കോട്ടയം പ്രിൻസിപ്പൽ സെഷൻസ് കോടതി തള്ളി. ഒന്നാം പ്രതി സാനു, രണ്ടാംപ്രതി നിയാസ്, അഞ്ചാം പ്രതി ചാക്കോ തുടങ്ങിയവര്‍ ഉൾപ്പെടെ അഞ്ച് പ്രതികളുടെ ജാമ്യാപേക്ഷയാണ് കോടതി തള്ളിയത്. 14 പ്രതികളാണ് കേസിലുള്ളത്. വിചാരണ തിയതി അടുത്ത മാസം രണ്ടിന് തീരുമാനിക്കും. കൊലപാതകം, തട്ടിക്കൊണ്ടുപോകൽ, ഗൂഢാലോചന, ഭവനഭേദനം, കുറ്റകരമായ തടഞ്ഞുവെക്കൽ, ദേഹോപദ്രവം ഏൽപിക്കൽ, ഭീഷണിപ്പെടുത്തൽ, തെളിവ് നശിപ്പിക്കൽ, തുടങ്ങിയ വകുപ്പുകളാണ് പ്രതികൾക്കു മേൽ ചുമത്തിയിരിക്കുന്നത്. കഴിഞ്ഞ വര്‍ഷം മെയ് 27നാണ് നാടിനെ നടുക്കിയ കൊലപാതകം നടന്നത്. കോട്ടയം മാന്നാനത്തെ വീട്ടില്‍ നിന്നും കെവിനെയും ബന്ധുവിനെയും അക്രമികള്‍ തട്ടിക്കൊണ്ടു പോവുകയായിരുന്നു. ദലിത് വിഭാഗത്തില്‍ പെട്ട കെവിന്‍ ഉയര്‍ന്ന ജാതിയില്‍പെട്ട നീനുവിനെ പ്രണയിച്ച് വിവാഹം കഴിച്ചതിലുള്ള വൈരാഗ്യമാണ് കൊലയില്‍ കലാശിച്ചത്.
Last Updated : Mar 27, 2019, 7:03 PM IST