കോട്ടയം : ബൈക്കില്‍ ഇടിച്ചുണ്ടായ അപകടത്തിൽ ഓട്ടോ ഡ്രൈവർ മരിച്ചു. പാലപ്ര വേങ്ങത്താനം മുണ്ടയ്ക്കൽ സുരേന്ദ്രൻ പിള്ളയുടെ മകൻ അഭിലാഷ് എം.എസ് (38) ആണ് ചൊവ്വാഴ്‌ച രാവിലെ മരിച്ചത്. കോട്ടയം മെഡിക്കല്‍ കോളജിൽ ചികിത്സയിലായിരുന്നു.
തിങ്കളാഴ്‌ച വൈകുന്നേരം 5.10ന് കാഞ്ഞിരപ്പള്ളി ഫയര്‍ സ്‌റ്റേഷന് സമീപത്തായിരുന്നു അപകടം. മുണ്ടക്കയം ഭാഗത്തുനിന്ന് വരികയായിരുന്നു ഇരുവാഹനങ്ങളും. സൈഡിലേക്ക് ബൈക്ക് തിരിഞ്ഞപ്പോള്‍ പെട്ടെന്ന് ഓട്ടോറിക്ഷ ബ്രേക്ക് ചെയ്യുകയും ബൈക്കിന്‍റെ പിന്നില്‍ ഇടിച്ച് മലക്കം മറിയുകയുമായിരുന്നു.