കരം കൊടുത്താല്‍ മാത്രം വോട്ട്: അങ്ങനെയും ഒരു കാലം ഓർത്തെടുത്ത് എംകെ സാനു മാഷ്

ഇ.എം.എസ് നമ്പൂതിരിപ്പാട് ആവശ്യപ്പെട്ടതിനെ തുടർന്നാണ് 1987-ൽ ഇടതു മുന്നണിയുടെ പിന്തുണയോടെ എറണാകുളം മണ്ഡലത്തിൽ നിന്നും സ്വതന്ത്ര സ്ഥാനാർഥിയായി സാനു മാസ്റ്റര്‍ മത്സരിച്ചത്. പണത്തിന്‍റെ സ്വാധീനം കുറഞ്ഞെങ്കിലും ജാതിയും മതവും ഇന്നും വോട്ടർമാരെ സ്വാധീനിക്കുന്ന ഘടകങ്ങളാണെന്ന് സാനു മാസ്റ്റര്‍

എറണാകുളം:ജനാധിപത്യത്തിന്‍റെ ഉത്സവമാണ് തെരഞ്ഞെടുപ്പ്. ചരിത്രത്തില്‍ ഓരോ തെരഞ്ഞെടുപ്പ് കാലത്തിനും പറയാൻ ആയിരം കഥകളുണ്ടാകും. കേരളത്തിന്‍റെ രാഷ്ട്രീയ ചരിത്രം മിക്കപ്പോഴും സാഹിത്യവും സാംസ്‌കാരിക ലോകവും ഇടകലർന്നതാണ്. സാഹിത്യകാരൻമാർ രാഷ്ട്രീയത്തില്‍ ഇടപെടുന്നതും രാഷ്ട്രീയം പറയുന്നതും കേരളത്തില്‍ പുതിയ കാര്യവുമല്ല. കേരള സംസ്ഥാനത്തിന്‍റെ രൂപീകരണത്തിന് മുൻപും ശേഷവും രാഷ്ട്രീയവുമായി അഭേദ്യ ബന്ധം പുലർത്തിയിരുന്ന മലയാള സാഹിത്യ സാംസ്‌കാരിക ലോകത്തെ കാരണവർ എം.കെ സാനു മാസ്റ്റര്‍ ഓർമകൾ പങ്കുവെയ്ക്കുകയാണ്.

ഇന്ത്യയ്ക്ക് സ്വാതന്ത്ര്യം ലഭിക്കുന്നതിന് മുൻപും ശേഷവും സാനുമാസ്റ്റർ വോട്ട് ചെയ്തിട്ടുണ്ട്. രാജവാഴ്ചയുടെ കാലത്തും അതിന് ശേഷവും കരം കൊടുക്കുന്നവർക്ക് മാത്രമേ വോട്ട് ചെയ്യാൻ അവകാശം ഉണ്ടായിരുന്നുള്ളൂ. ആ കാലത്ത് തന്നെ താൻ വോട്ട് ചെയ്തിരുന്നുവെന്ന് എം.കെ.സാനു മാസ്റ്റർ ഓർക്കുകയാണ്. സ്വാതന്ത്ര്യം ലഭിച്ച ശേഷവും പരസ്യമായി വോട്ട് ചെയ്യുന്ന രീതിയായിരുന്നു. ചിലർ ആളുകളെ കൂട്ടിക്കൊണ്ട് വരികയും അവർ പറയുന്ന ആളുകൾക്ക് വോട്ട് ചെയ്യുന്നതും കണ്ടിരുന്നു. പണക്കാർ, ജന്മിമാർ എന്നിവരായിരുന്നു പരസ്യമായി വോട്ട് ചെയ്യിച്ചിരുന്നത്. വോട്ട് ചെയ്‌താല്‍ പ്രതിഫലം നൽകും. നേരത്തെ പ്രതിഫലം കൊടുത്ത് വോട്ട് ചെയ്യുന്ന രീതിയും അന്നുണ്ടായിരുന്നു. വോട്ടു ചെയ്യുന്നതിന് രഹസ്യ സ്വഭാവം കൈവന്നതോടെ പരസ്യമായി പണം കൊടുക്കുന്ന രീതിയും അവസാനിച്ചു.

ഒരിക്കലും വോട്ട് ചെയ്യാതിരുന്നിട്ടില്ലെന്നും എം.കെ. സാനുമാസ്റ്റർ പറഞ്ഞു. പണത്തിന്‍റെ സ്വാധീനം കുറഞ്ഞെങ്കിലും ജാതിയും മതവും ഇന്നും വോട്ടർമാരെ സ്വാധീനിക്കുന്ന ഘടകങ്ങളാണ്. സാഹിത്യവും, സാംസ്കാരിക പ്രവർത്തനവുമായിരുന്നു സ്വന്തം മേഖലയെങ്കിലും സാനുമാസ്റ്റർക്ക് സ്വന്തമായ രാഷ്ട്രീയ വീക്ഷണമുണ്ടായിരുന്നു. പുരോഗമന കലാസാഹിത്യ സംഘം പ്രസിഡന്‍റ് ആയിരിക്കെ അഴിമതിക്കെതിരെ നടത്തിയ പ്രതികരണങ്ങളായിരുന്നു തന്നെ നിയമസഭയിൽ മത്സരിപ്പിക്കണമെന്ന ആവശ്യമുയരാൻ കാരണമായതെന്ന് സാനുമാസ്റ്റർ ഓർക്കുന്നു. സ്ഥാനാർഥിയാകാൻ താല്പര്യമില്ലായിരുന്നു. സാക്ഷാൽ ഇ.എം.എസ് നമ്പൂതിരിപ്പാട് ആവശ്യപ്പെട്ടതിനെ തുടർന്നാണ് 1987-ൽ ഇടതു മുന്നണിയുടെ പിന്തുണയോടെ എറണാകുളം മണ്ഡലത്തിൽ നിന്നും സ്വതന്ത്ര സ്ഥാനാർഥിയായി മത്സരിച്ചത്.

തത്വാധിഷ്ഠിതമായ രാഷ്ട്രീയമാണ് ഇത്തവണ അവതരിപ്പിക്കുന്നത് എന്ന് ഇ.എം.എസ് പറഞ്ഞു. അത് എന്താണെന്ന് താൻ ഇ.എം.എസിനോട് തന്നെ ചോദിച്ചു. ജാതി മത വിഭാഗങ്ങളുടെ പിന്തുണ തേടാതെയും, അവരുമായി കൂട്ട് കൂടാതെയും തികച്ചും രാഷ്ട്രീയമായി മത്സരിക്കാനാണ് ഉദ്ദേശിക്കുന്നത്. അതിനോട് സാനു മാസ്റ്റർക്ക് യോജിപ്പുണ്ടോയെന്നും ഇഎംഎസ് ചോദിച്ചു. സാംസ്കാരിക രംഗത്തുള്ളവരെ കൂടി ഉൾപ്പെടുത്താൻ ഉദ്ദേശിക്കുന്നു. രാഷ്ട്രീയ രംഗത്തെ സാംസ്കാരികവൽക്കരിക്കുന്ന പ്രവർത്തനമായിട്ടാണ് അതിനെ ഇഎംഎസ് വ്യഖ്യാനിച്ചതെന്നും സാനു മാസ്റ്റർ ഓർമ്മിക്കുന്നു.

അച്ചുതമേനോൻ, ഗൗരിയമ്മ ഉൾപ്പടെയുള്ള പ്രമുഖർ തനിക്ക് വേണ്ടി വോട്ടു പിടിക്കാൻ എറണാകുളത്ത് എത്തിയിരുന്നു. തോപ്പിൽ ഭാസി, മലയാറ്റൂർ രാമകൃഷ്ണൻ ഉൾപ്പടെയുള്ള സാഹിത്യ സാംസ്കാരിക രംഗത്തെ പ്രമുഖരും പ്രചാരണ രംഗത്തുണ്ടായിരുന്നു. പൊതുവെ ഇടതുപക്ഷ വിരുദ്ധ നിലപാടുകൾ സ്വീകരിച്ച പലരും തന്നെ വിജയിപ്പിക്കാൻ ശ്രമിച്ചിരുന്നു. തന്നെ വിജയിപ്പിക്കണമെന്ന് ആവശ്യപ്പെട്ട് പുറത്തിറക്കിയ പ്രസ്താവനയിൽ കമ്മ്യൂണിസ്റ്റ് പാർട്ടികളെ എതിർക്കുന്ന എം. ഗോവിന്ദൻ വരെയുണ്ടായിരുന്നു.

കന്യാസ്ത്രീകളും പുരോഹിതന്മാരും തനിക്ക് വോട്ട് ചെയ്തെന്നും സാനു മാസ്റ്റർ ഓർക്കുന്നു. വളരെ പ്രായമായ രണ്ടു പേർ വോട്ടു ചെയ്യാൻ എത്തിയത് കണ്ടതിനെ തുടർന്ന് അവരെ സഹായിക്കണമെന്ന് പ്രവർത്തകരോട് പറഞ്ഞു. പിന്നീട് അറിയാൻ കഴിഞ്ഞത് കഴിഞ്ഞ തെരെഞ്ഞെടുപ്പുകളിലൊന്നും വോട്ട് ചെയ്യാതിരുന്ന ഇവർ ഡൽഹിയിലുള്ള മകൻ സാനു മാസ്റ്റർക്ക് വോട്ട് ചെയ്യണമെന്ന് അറിയിച്ചതിനെ തുടർന്നാണ് വോട്ടിംഗിനെത്തിയതെന്നാണ്. കിഡ്നി മാറ്റിവെക്കാൻ ബംഗളൂരുവിൽ അഡ്മിറ്റായ ഒരു രോഗി ശസ്ത്രക്രിയ തീയതി മാറ്റി വെച്ച് വോട്ടെടുപ്പിനെത്തിയതും ഓർമ്മയുണ്ട്. ഇത്തരത്തിൽ എല്ലാ വിഭാഗം ആളുകളും പിന്തുണച്ചതോടെയാണ് നിയമസഭയിലേക്ക് തെരെഞ്ഞെടുക്കപ്പെട്ടതെന്ന് സാനുമാസ്റ്റർ ഓർക്കുന്നു.

എം.എൽ.എ ആയതോടെ അനേകം പേർക്ക് സഹായം ചെയ്യാൻ സാധിച്ചു. ബുദ്ധി മാന്ദ്യം സംഭവിച്ച കുട്ടികളുടെ അവകാശങ്ങൾ സംരക്ഷിക്കുന്നതിന് വേണ്ടിയുള്ള ബില്‍ നിയമസഭയിൽ അവതരിപ്പിച്ചു. എറണാകുളത്തെ ഗോശ്രീ പാലങ്ങൾ യാഥാർഥ്യമാക്കുന്നതിന് നിയമസഭയിൽ കവിത ചൊല്ലി ശബ്ദമുയർത്തി. ഗ്രന്ഥശാല ബില്‍ അവതരിപ്പിച്ചു. രണ്ടാം തവണ നിയമസഭയിലേക്ക് മത്സരിക്കാൻ ആവശ്യപ്പെട്ടിരുന്നുവെങ്കിലും പ്രവർത്തന മണ്ഡലം രാഷ്ട്രീയമല്ലെന്ന് മനസിലാക്കി പിന്മാറുകയായിരുന്നു.

നിയമസഭയിലേക്ക് തെരെഞ്ഞെടുക്കപ്പെട്ടെതിനെ തുടർന്ന് പാർട്ടിയിൽ ചേരാൻ പ്രേരണയുണ്ടായിരുന്നു. എന്നാൽ തനിക്ക് പാർട്ടിയുടെ ചട്ടക്കൂടിൽ ഒതുങ്ങി നിൽക്കാൻ കഴിയില്ലെന്ന് മനസിലാക്കി നിരസിക്കുകയായിരുന്നു. സാമുദായിക കാരണങ്ങളാലാണ് ഇടതുപക്ഷത്തിന് എറണാകുളം മണ്ഡലത്തിൽ ജയിക്കാൻ കഴിയാത്തതെന്നും എം.കെ.സാനു മാസ്റ്റർ വിലയിരുത്തുന്നു.

പുതിയ തലമുറയോട് പറയാനുള്ളത്, രാഷ്ട്രീയത്തെ അവഗണിക്കരുതെന്നാണ്. ഒരു ജനതയുടെ ഭാഗധേയം നിർണ്ണയിക്കുന്നത് രാഷ്ട്രീയമാണ്. ജനങ്ങളുടെ സുരക്ഷിതത്വവും ക്ഷേമവും ഉറപ്പുവരുത്തുന്നവരുടെ കൈകളിൽ രാഷ്ട്രീയം എത്തിച്ചേരണം. രാഷ്ട്രീയത്തെ നിരാകരിക്കുന്നത് അപകടം ചെയ്യുമെന്നും അദ്ദേഹം പറഞ്ഞു. വരുന്ന തെരെഞ്ഞെടുപ്പിൽ ഭരണ തുടർച്ചയ്ക്കുള്ള സാധ്യതയാണ് ഇപ്പോൾ താൻ കാണുന്നത്. ഇനിയുള്ള ദിവസങ്ങളിൽ എന്തു സംഭവിക്കുമെന്ന് പറയാൻ കഴിയില്ലന്നും സാനു മാസ്റ്റർ അഭിപ്രായപ്പെട്ടു.