എറണാകുളം: ആലുവ എസ് പി ഓഫിസിന് മുന്നിലെ കോണ്‍ഗ്രസ് പ്രവര്‍ത്തകരുടെ പ്രതിഷേധം അവസാനിപ്പിച്ചു. നേതൃത്വത്തിന്‍റെ നിർദേശത്തെത്തുടർന്നാണ് സമരം അവസാനിപ്പിച്ചതെന്ന് ഡിസിസി പ്രസിഡന്‍റ് മുഹമ്മദ് ഷിയാസ് പറഞ്ഞു. അതേ സമയം ആലുവ ഈസ്റ്റ് പൊലീസ് സ്റ്റേഷനിന് മുന്നിലെ ജനപ്രതിനിധികളഉടെ സമരം തുടരും. തുടര്‍ സമരപരിപാടികള്‍ നേതൃത്വവുമായി ആലോചിച്ച് തീരുമാനിക്കുമെന്ന് നേതാക്കള്‍ അറിയിച്ചു.
മൊഫിയ പര്‍വീന്‍റെ ആത്മഹത്യയില്‍ ആരോപണ വിധേയനായ സി.ഐ എൽ സുധീറിനെ സസ്പെൻഡ് ചെയ്യണമെന്ന് ആവശ്യപ്പെട്ടായിരുന്നു സമരം. പ്രതിഷേധം ശക്തമായതോടെ സി.ഐയെ പൊലീസ് ആസ്ഥാനത്തേക്ക് സ്ഥലം മാറ്റി ഇന്നലെ രാത്രി (24 നവംബര്‍ 2021) സര്‍ക്കാര്‍ ഉത്തരവിറക്കി. എന്നാല്‍ സി.ഐയെ സസ്പെൻഡ് ചെയ്യാതെ സമരം അവസാനിപ്പിക്കില്ലെന്ന നിലപാടിലിയിരുന്നു പ്രവര്‍ത്തകര്‍.