മരട് ഫ്ലാറ്റ് സമുച്ചയങ്ങളിലെ വാതിലുകളും ജനലുകളും വിട്ടുകിട്ടണമെന്ന് ഫ്ലാറ്റുടമകള്‍

ഫ്ലാറ്റുകളിൽ നിന്നും പൊളിച്ചു മാറ്റുന്ന ഉപകരണങ്ങൾ വേണമെന്ന ആവശ്യവുമായി ഫ്ലാറ്റ് ഉടമകൾ രംഗത്തെത്തിയതോടെ പൊളിക്കൽ കരാർ നൽകിയിട്ടുള്ള കമ്പനികൾ പ്രതിസന്ധിയിലായി. പരാതികൾ പരിശോധിക്കാനായി ജസ്റ്റിസ് കെ. ബാലകൃഷ്‌ണൻ നായർ കമ്മിറ്റിയുടെ പ്രത്യേക സിറ്റിങ് കൊച്ചിയിൽ ആരംഭിച്ചു.

എറണാകുളം: മരടിൽ പൊളിച്ച് നീക്കാൻ സുപ്രീം കോടതി ഉത്തരവിട്ട ഫ്ലാറ്റ് സമുച്ചയങ്ങളിലെ വാതിലുകളും ജനലുകളും വിട്ടുകിട്ടണമെന്നാവശ്യപ്പെട്ട് ഫ്ലാറ്റ് ഉടമകൾ പരാതിയുമായി ജസ്റ്റിസ് കെ. ബാലകൃഷ്‌ണൻ നായർ കമ്മിറ്റിയെ സമീപിച്ചു. ഈ പരാതികൾ പരിശോധിക്കാനായി കമ്മിറ്റിയുടെ പ്രത്യേക സിറ്റിങ് കൊച്ചിയിൽ ആരംഭിച്ചു.

പൊളിച്ചു മാറ്റുന്ന ഉപകരണങ്ങൾ വേണമെന്ന ആവശ്യവുമായി ഫ്ലാറ്റ് ഉടമകൾ രംഗത്തെത്തിയതോടെ പൊളിക്കൽ കരാർ നൽകിയിട്ടുള്ള കമ്പനികൾ പ്രതിസന്ധിയിലായി. എഡിഫെയ്‌സ്, വിജയ് സ്റ്റീൽസ് എന്നീ കമ്പനികളുടെ നേതൃത്വത്തിൽ പൊളിച്ചു മാറ്റുന്ന സമുച്ചയങ്ങളിലെ ജനലുകളും വാതിലുകളും നീക്കം ചെയ്യുന്ന ജോലികൾ പുരോഗമിക്കുന്ന സമയത്താണ് ഫ്ലാറ്റ് ഉടമകൾ പുതിയ പരാതിയുമായി സമിതിക്ക് മുന്നിൽ എത്തിയിരിക്കുന്നത്. എന്നാൽ ഉടമകളുടെ ആവശ്യം അംഗീകരിക്കാനാവില്ലെന്നും കരാർ പ്രകാരം ഇത്തരം സാധനങ്ങളുടെ ഉടമസ്ഥാവകാശം പൊളിക്കാൻ കരാറെടുത്ത കമ്പനികൾക്കാണെന്നും കമ്പനി പ്രതിനിധികൾ നിലപാട് അറിയിച്ചു. ഈ സാഹചര്യത്തിൽ ജസ്റ്റിസ് കെ. ബാലകൃഷ്‌ണൻ നായരുടെ നേതൃത്വത്തിൽ ചേരുന്ന സമിതിയുടെ നിലപാട് നിർണായകമാകും.

അതേസമയം പൊളിക്കുന്ന ഫ്ലാറ്റുകളിലെ അവശിഷ്ടങ്ങള്‍ നീക്കം ചെയ്യുന്നതിനായി മരട് നഗരസഭ താത്പര്യപത്രം ക്ഷണിച്ചിട്ടുണ്ട്. നവംബർ ആറിന് വൈകിട്ട് അഞ്ച് മണിവരെയാണ് സമയം അനുവദിച്ചിട്ടുള്ളത്. ഇതോടെ അവശിഷ്ടങ്ങൾ പ്രദേശത്ത് നിന്ന് നീക്കം ചെയ്യുന്നതും ഇത് പുനരുപയോഗത്തിന് പ്രയോജനപ്പെടുത്തുന്നതും കരാർ കിട്ടുന്നവരുടെ ചുമതലയാകും.

കരാർ ലഭിച്ച കമ്പനികൾ ഫ്ലാറ്റുകളുടെ ഉൾവശം പൊളിക്കുന്നത് ആരംഭിച്ചിട്ടുണ്ട്. ഇത് പൂർത്തിയായതിന് ശേഷമായിരിക്കും നിയന്ത്രിത സ്ഫോടനം വഴിയുള്ള പൊളിക്കൽ നടപടികളിലേക്ക് കമ്പനികൾ കടക്കുന്നത്. ആൽഫ സെറീനിലെ രണ്ട് ഫ്ളാറ്റുകൾ വിജയ് സ്റ്റീൽസും ഹോളി ഫെയ്ത്ത്, ഗോൾഡൻ കായലോരം, ജെയിൻ ഹൗസിങ് എന്നീ മൂന്ന് ഫ്ലാറ്റ് സമുച്ചയങ്ങൾ എഡിഫെയ്‌സ് എൻജിനീയറിങ്ങിനുമാണ് പൊളിക്കാൻ കരാർ ലഭിച്ചിട്ടുള്ളത്.