എറണാകുളം : നടിയെ ആക്രമിച്ച കേസിൽ എട്ടാം പ്രതി നടൻ ദിലീപിന്‍റെ ജാമ്യം റദ്ദാക്കണമെന്ന് ആവശ്യപ്പെട്ട് പ്രോസിക്യൂഷൻ സമർപ്പിച്ച ഹർജി വിചാരണക്കോടതി ഇന്ന് വീണ്ടും പരിഗണിക്കും. പ്രതിഭാഗത്തിന്‍റെയും പ്രോസിക്യൂഷന്‍റെയും വാദങ്ങൾ ഇന്ന് കോടതിയിൽ നടക്കും. പുകമറ സൃഷ്‌ടിക്കാനാണ് പ്രോസിക്യൂഷൻ്റെ ശ്രമമെന്നായിരുന്നു പ്രതിഭാഗം ആരോപിച്ചത്.
തനിക്കെതിരായ ആരോപണങ്ങൾ പ്രോസിക്യൂഷൻ കെട്ടിച്ചമച്ചതാണെന്നും നടൻ ദീലീപ് വാദിച്ചിരുന്നു. ബാലചന്ദ്രകുമാറിൻ്റെ തിരക്കഥയാണ് കേസിന് ആധാരം, ബാലചന്ദ്രകുമാറിൻ്റെ മൊഴി വിശ്വസിക്കാൻ കഴിയാത്തതാണ്. 6 മാസമായിട്ടും ബാലചന്ദ്രകുമാർ നൽകിയ പെൻഡ്രൈവിൻ്റെ ശാസ്ത്രീയ പരിശോധനാഫലം ലഭിക്കാത്തതെന്തെന്നും പ്രതിഭാഗം സംശയമുന്നയിച്ചിരുന്നു.