എറണാകുളം : സ്വർണക്കടത്തിന്‍റെയും എത്തിക്കുന്ന സ്വര്‍ണം പിടിച്ചെടുക്കുന്നതിന്‍റെയും ബുദ്ധി കേന്ദ്രം അർജുൻ ആയങ്കിയെന്ന് കസ്റ്റംസ്. അർജുൻ അന്വേഷണവുമായി സഹകരിക്കുന്നില്ല. വ്യാജ മൊഴികളാണ് നൽകുന്നത്. ഫോൺ ഉൾപ്പടെ തെളിവുകൾ നശിപ്പിച്ച ശേഷമാണ് ചോദ്യം ചെയ്യലിന് ഹാജരായതെന്നും കസ്റ്റംസ് കോടതിയെ അറിയിച്ചു.
സ്വർണവുമായി ഷെഫീഖ് കരിപ്പൂർ വിമാനത്താവളത്തിലെത്തുന്ന വിവരം അർജുന് അറിയാമായിരുന്നു. പ്രതിയുടെ സ്വർണക്കടത്തിലെ പങ്ക് തെളിയിക്കുന്ന ഫോൺ രേഖകൾ, വാട്‌സ് ആപ്പ് ചാറ്റുകൾ ഉൾപ്പടെ ലഭിച്ചിട്ടുണ്ട്.
സജേഷിന്‍റെ പേരിലുള്ള കാർ അർജുൻ ആയങ്കിയുടേതാണ്. സജേഷ് അർജുന്‍റെ ബിനാമിയാണ്. മറ്റ് വരുമാന സ്രോതസുകളില്ലാത്ത അർജുൻ ആർഭാട ജീവിതമാണ് നയിച്ചിരുന്നതെന്നും കസ്റ്റംസ് ആരോപിക്കുന്നു.