മയിൽ മുട്ടകൾ അടയിരുന്ന് വിരിയിച്ച് അമ്മക്കോഴി ; 5 കുഞ്ഞുങ്ങള്‍

കാട് വെട്ടിത്തളിക്കുന്നതിനിടയിൽ കിട്ടിയ മയിൽ മുട്ടയിൽ അട ഇരിക്കാൻ പെൺ മയിൽ എത്താത്തതിനാലാണ് മുട്ടകൾ കോഴിയിൽ അടവച്ച് വിരിയിച്ചത്

കണ്ണൂർ : സ്വന്തമല്ലെങ്കിലും തന്‍റെ ചൂടേറ്റ് വിരിഞ്ഞ അഞ്ച് കുഞ്ഞുങ്ങളെ കരുതലോടെ ചിറകോടുചേർത്ത് നിർത്തി പരിപാലിക്കുകയാണ് ഒരമ്മക്കോഴി. പോരു കോഴിയിൽപ്പെട്ട അസീൽ എന്നയിനം കോഴിയിൽ മയില്‍ കുഞ്ഞുങ്ങളെ അടവച്ച് വിരിയിച്ചിരിക്കുകയാണ് തളിപ്പറമ്പില്‍. പെൺമയിൽ എത്താതായതോടെ വനം വകുപ്പിന് ലഭിച്ച മുട്ടകളാണ് മാർക്ക്‌ പ്രവർത്തകരുടെ സഹായത്തിൽ കോഴിയിൽ അടവെച്ച് വിരിയിച്ചത്.

സെപ്റ്റംബർ 11 നാണ് കാട് വെട്ടിത്തളിക്കുന്നതിനിടയിൽ മയ്യിൽ പ്രദേശത്ത് നിന്നും വീട്ടുകാർക്ക് മയിലിന്‍റെ മുട്ടകൾ ലഭിക്കുന്നത്. സംഭവം ശ്രദ്ധയിൽപ്പെട്ടതോടെ വീട്ടുകാർ തളിപ്പറമ്പിലെ വനം വകുപ്പ് ഉദ്യോഗസ്ഥരെ വിളിച്ച് വിവരം അറിയിച്ചു.

പെൺമയിൽ അട ഇരിക്കാൻ ഏത്താതായതോടെ വനം വകുപ്പിന്‍റെ നിർദേശപ്രകാരം മലബാർ അവേർനസ് ആൻഡ് റെസ്ക്യൂ സെന്‍റർ ഫോർ വൈൽഡ് ലൈഫ് ഉദ്യോഗസ്ഥർ സ്ഥലത്തെത്തി മുട്ടയുടെ സംരക്ഷണം ഏറ്റെടുക്കുകയായിരുന്നു. ഇൻക്യൂബേറ്റർ സൗകര്യമില്ലാത്തതിനാൽ പാപ്പിനിശ്ശേരിയിലെ ഫാമിലുള്ള കോഴിയെ ഉപയോഗിച്ച് അടവയ്ക്കാനുള്ള സൗകര്യമൊരുക്കി.

25 ദിവസങ്ങൾ കഴിഞ്ഞതോടെ 5 കുഞ്ഞുങ്ങൾ വിരിഞ്ഞ് പുറത്തുവന്നു. പിടക്കോഴിയെ സ്വന്തം അമ്മയാണെന്ന് കരുതി എല്ലാ കുസൃതികളും കാണിച്ചാണ് കുഞ്ഞുങ്ങൾ കൂട്ടിലും പുറത്തും മറ്റ് കോഴികളുടെ കൂടെ നടക്കുന്നത്. പുഴുക്കള്‍, കോഴിത്തീറ്റ തുടങ്ങിയവയാണ് മയിൽ കുഞ്ഞുങ്ങളും കഴിക്കുന്നത്.

15 ദിവസം മാത്രം പ്രായമുള്ള മയിൽ കുഞ്ഞുങ്ങൾ പറക്കമുറ്റുന്ന പ്രായം വരെ തള്ളക്കൊഴിയുടെ കരുതലിൽ കഴിയും. സ്വന്തമായി ഇര തേടാവുന്നത്രയുമാകുമ്പോള്‍ വനം വകുപ്പ് ഇവയെ സ്വന്തം ആവാസവ്യവസ്ഥയിലേക്ക് തുറന്നുവിടും.