'പിണറായി വിജയൻ വഴികാട്ടി' ; കമ്മ്യൂണിസ്റ്റ് പ്രസ്ഥാനവുമായുള്ള ബന്ധത്തിന് തെളിവ് തന്‍റെ പേര് തന്നെയെന്ന് എം.കെ സ്റ്റാലിൻ

കേന്ദ്ര സർക്കാരിനെതിരെ രൂക്ഷ വിമർശനം ഉന്നയിച്ച സ്റ്റാലിൻ ബ്രിട്ടീഷുകാർ പോലും ചെയ്യാത്ത കടുത്ത കാര്യങ്ങളാണ് ബി.ജെ.പി സർക്കാർ ചെയ്യുന്നതെന്നും ആരോപിച്ചു

കണ്ണൂർ : ഇന്ത്യയിലെ മുഖ്യമന്ത്രിമാരുടെ ലൈഫ് ലൈൻ ആണ് പിണറായി വിജയനെന്ന് തമിഴ്‌നാട് മുഖ്യമന്ത്രി എം.കെ സ്റ്റാലിൻ. സിപിഎം പാർട്ടി കോണ്‍ഗ്രസ് വേദിയിൽ സംസാരിക്കുകയായിരുന്നു അദ്ദേഹം. യോഗത്തിൽ പങ്കെടുക്കാൻ മുഖ്യമന്ത്രി പറഞ്ഞപ്പോൾ സമ്മതിച്ചു. പലകാരണങ്ങൾ കൊണ്ട് പങ്കെടുക്കേണ്ടത് തന്‍റെ കടമയാണെന്നും സ്റ്റാലിൻ പറഞ്ഞു.

സംഘകാലം മുതൽ കേരള തമിഴ് ബന്ധമുണ്ട്. മാർക്‌സിസ്റ്റ് ആശയങ്ങൾക്കും ദ്രാവിഡ ആശയങ്ങൾക്കും ആഴത്തിലുള്ള ബന്ധമുണ്ട്. എല്ലാറ്റിനും ഉപരി തന്‍റെ പേര് സ്റ്റാലിൻ എന്നാണെന്നും കമ്മ്യൂണിസ്റ്റ് പ്രസ്ഥാനവുമായുള്ള ബന്ധത്തിന് അതുതന്നെ തെളിവാണെന്നും സ്റ്റാലിൻ പറഞ്ഞു.

പ്രസംഗത്തിൽ കേന്ദ്ര സർക്കാരിനെതിരെയും സ്റ്റാലിൻ രൂക്ഷ വിമർശനമുയർത്തി. കമ്മ്യൂണിസ്റ്റ് രക്തസാക്ഷികളുടെയും സ്വാതന്ത്ര്യ സമര സേനാനികളുടെയും നാടാണ് കണ്ണൂർ. പിണറായി വിജയൻ തനിക്ക് വഴി കാട്ടിയാണ്. ഒരു കൈയില്‍ പോരാട്ട വീര്യവും മറുകയ്യിൽ ക്ഷേമ പ്രവർത്തനങ്ങളുമായാണ് പിണറായി വിജയൻ പ്രവർത്തിക്കുന്നതെന്നും സ്റ്റാലിൻ പറഞ്ഞു.

അതേസമയം കേന്ദ്ര സർക്കാരിനെതിരെയും സ്റ്റാലിൻ ആഞ്ഞടിച്ചു. ഇന്ത്യയെ സംരക്ഷിക്കാൻ സംസ്ഥാനങ്ങളെ സംരക്ഷിക്കണം. ബ്രിട്ടിഷ് കാലത്ത് കൂടി ചെയ്യാത്ത കടുത്ത കാര്യങ്ങളാണ് ബി.ജെ.പി സർക്കാർ ചെയ്യുന്നത്. സംസ്ഥാനങ്ങളെ ബുദ്ധിമുട്ടിക്കുന്ന ബി.ജെ.പി ജനങ്ങളെയാണ് യഥാർഥത്തിൽ ദുരിതത്തിലാക്കുന്നത്.

കേന്ദ്രം ജി.എസ്.ടി കുടിശ്ശിക നൽകുന്നില്ല. പല നിയമങ്ങളും ചർച്ചയില്ലാതെയാണ് കേന്ദ്ര സർക്കാർ പാസാക്കുന്നത്. സംസ്ഥാനങ്ങളുടെ അധികാരം എടുത്തുകളയുന്നത് പലവിധ പ്രശ്നങ്ങൾക്കും വഴിവയ്ക്കുന്നു. കേന്ദ്രത്തിന്‍റെ മിക്ക നടപടികളും ഭരണഘടനാവിരുദ്ധവും ജനാധിപത്യ വിരുദ്ധവുമാണ്.

അതിനാൽ സംസ്ഥാനങ്ങൾ ഒന്നിച്ചുചേർന്ന് അവകാശങ്ങൾക്കായി പ്രക്ഷോഭം നടത്തണം. ഫെഡറല്‍ സംവിധാനം ശക്തിപ്പടുത്താൻ ശക്തമായ പ്രക്ഷോഭം അനിവാര്യമാണെന്നും സ്റ്റാലിൻ കൂട്ടിച്ചേർത്തു.