കണ്ണൂര്‍: 63-മത് സംസ്ഥാന സ്‌കൂള്‍ കായികമേളയുടെ അണിയറയില്‍ ആവേശമാണ് ശ്രീകുമാരന്‍ നായരുടെ ശബ്‌ദം. പതിനഞ്ച് വര്‍ഷമായി സംസ്ഥാന സ്‌കൂള്‍ കായികമേളയുടെ സ്ഥിരസാന്നിധ്യമാണ് ശ്രീകുമാരന്‍ നായര്‍.
കായികമേളയിലെ ശബ്ദസാന്നിധ്യമായി ശ്രീകുമാരന്‍ നായർ 32 വര്‍ഷങ്ങള്‍ക്ക് മുമ്പാണ് ശ്രീകുമാരന്‍ അനൗണ്‍സിങ് രംഗത്തെത്തുന്നത്. കമന്‍ററി രംഗത്തും പ്രവർത്തിക്കുന്നുണ്ട്. മികച്ച ശബ്ദവും തന്‍റേതായ ശൈലി സൃഷ്ടിക്കാൻ കഴിഞ്ഞതുമാണ് ഈ രംഗത്ത് ശ്രീകുമാരനെ താരമാക്കി മാറ്റിയത്.
15 വർഷങ്ങൾക്ക് മുമ്പ് തിരുവനന്തപുരത്ത് നടന്ന സംസ്ഥാന സ്‌കൂള്‍ കായികമേളയിലൂടെയാണ് ആദ്യമായി ശ്രീകുമാരന്‍ കായികമേള അനൗണ്‍സിങ് രംഗത്തേക്ക് എത്തുന്നത്. പിന്നീടങ്ങോട്ട് എല്ലാ കായികമേളകളിലും പ്രവർത്തിച്ചു.
63-മത് കായികമേള നടക്കുമ്പോള്‍ കായിക മത്സര രംഗത്ത് വന്‍ പുരോഗതിയാണ് ഉണ്ടായിട്ടുള്ളതെന്ന് ശ്രീകുമാരന്‍ നായർ പറയുന്നു. നാഷണല്‍ ലെവല്‍ മത്സരങ്ങള്‍ക്ക് ആവശ്യമായ എല്ലാ സൗകര്യങ്ങളും ഒരുക്കാന്‍ സംഘാടകര്‍ക്കായെന്നും സുരക്ഷാക്രമീകരണങ്ങള്‍ കുറ്റമറ്റതാണെന്നും അദ്ദേഹം പറയുന്നു.
