ആലപ്പുഴ: മകന് ഐസ്ക്രീമിൽ വിഷം നൽകിയ ശേഷം യുവതി തൂങ്ങിമരിച്ചു. അമ്പലപ്പുഴ വടക്ക് പഞ്ചായത്ത് നാലാം വാർഡ് വണ്ടാനം പള്ളി വെളിവീട്ടിൽ റഹ്മത്ത് (37) ആണ് ഇളയ മകന് ഐസ്ക്രീമിൽ വിഷം നൽകിയ ശേഷം ആത്മഹത്യ ചെയ്‌തത്. ചൊവ്വാഴ്‌ച വൈകീട്ട് അഞ്ചോടെയായിരുന്നു സംഭവം.
മുഫാസിലിന് (7) വയറുവേദന അനുഭവപ്പെട്ടതിനെ തുടർന്ന് പിതാവ് മുജീബ് മറ്റ് രണ്ട് മക്കളുമായി വണ്ടാനം മെഡിക്കൽ കോളജ് ആശുപത്രിയിലെത്തി. സംശയം തോന്നി ഡോക്‌ടർമാർ അന്വേഷിച്ചപ്പോഴാണ് വിഷം നൽകിയ വിവരം പറയുന്നത്. തുടർന്ന് വീട്ടിലെത്തിയപ്പോഴാണ് റഹ്മത്തിനെ തൂങ്ങിമരിച്ച നിലയിൽ കണ്ടെത്തിയത്.