ആലപ്പുഴ: ചേര്‍ത്തലയില്‍ ഒരു ഗാന്ധിയുണ്ട്. വഴിയോരങ്ങളിലെ പാഴ്‌വസ്‌തുക്കള്‍ പെറുക്കി വിറ്റ് കിട്ടുന്ന പൈസ കൊണ്ട് പാവങ്ങളെ സഹായിയ്ക്കുന്ന ഒരു ഗാന്ധി. ഒരേ സമയം പ്രകൃതിയേയും മനുഷ്യനേയും ഒരു പോലെ ചേര്‍ത്ത് നിര്‍ത്തുന്ന ഒരു മനുഷ്യന്‍. പരിസ്ഥിതി പ്രവർത്തകനും റിട്ട. കെഎസ്ആർടിസി ഡ്രൈവറുമായ ചേർത്തല സ്വദേശി എസ്.എൽ വർഗീസ് എന്ന ചേര്‍ത്തല ഗാന്ധിയുടെ കഥയാണിത്.
പുലർച്ചെ 6 മണിയോടെ ചേർത്തല മുട്ടം പള്ളിയിലെ പ്രാർത്ഥനയ്ക്ക് ശേഷം മാർക്കറ്റില്‍ വർഗീസ് എത്തുമ്പോള്‍ കടകൾക്ക് മുന്നിൽ കാർട്ടൻ ബോക്‌സുകളും പ്ലാസ്റ്റിക് കുപ്പിയും പാഴ് പേപ്പറുകളും കിടക്കുന്നുണ്ടാകും. കടകൾ നടത്തുന്നവർക്ക് അറിയാം ചേർത്തല ഗാന്ധിയുടെ ചാരിറ്റി പ്രവർത്തനം. അതുകൊണ്ട് കടയിലെ പാഴ് വസ്‌തുക്കൾ കളയാതെ സൂക്ഷിച്ച് വയ്ക്കും. വഴിയോരത്ത് കിടക്കുന്ന വസ്‌തുക്കളും പെറുക്കിയെടുത്ത് വീട്ടിലെത്തുമ്പോൾ 10 മണിയായിട്ടുണ്ടാകും. തുടർന്ന് ഭാര്യ സെലിയാമ്മയും പ്ലാസ്റ്റിക് വേർതിരിയ്ക്കാനായി ഭർത്താവിനൊപ്പം ചേരും.