ആലപ്പുഴ: കരുമാടി ഗവ. ഹൈസ്‌കൂളിലെ ആറാം ക്ലാസ് വിദ്യാർഥിയായ മിഥുനോട് ഏറ്റവും അടുത്ത കൂട്ടുകാരനാരെന്ന് ചോദിച്ചാല്‍ കുട്ടപ്പനെന്ന് ഉത്തരം നല്‍കും. കുട്ടപ്പന് ഒരു പ്രത്യേകയുണ്ട്, കുട്ടപ്പന് ഒരു പൂവന്‍ കോഴിയാണ്. പതിനൊന്നുകാരന്‍റെയും പൂവന്‍ കോഴിയുടേയും അപൂര്‍വ സൗഹൃദത്തിന്‍റെ കഥയാണിത്.
സൈക്കിളില്‍ ഒരുമിച്ച് കറക്കം, പതിനൊന്നുകാരന് കൂട്ടായി പൂവന്‍ കോഴി; അപൂര്‍വ സൗഹൃദത്തിന്‍റെ കഥ
ഒന്നര വർഷം മുന്‍പാണ് മിഥുന്‍റെ കുടുംബം പൂവൻ കോഴിയെ വാങ്ങുന്നത്. കുട്ടപ്പൻ എന്ന് ഓമനപ്പേരുമിട്ടു. ലോക്‌ഡൗണ്‍ കാലത്ത് കുട്ടപ്പനായിരുന്നു മിഥുന്‍റെ കൂട്ട്. ആദ്യമൊക്കെ മിഥുൻ കളിയ്ക്കുമ്പോൾ കുട്ടപ്പൻ നോക്കി നിൽക്കുമായിരുന്നു. ഇപ്പോള്‍ പന്ത് കളിയ്ക്കാനൊക്കെ മിഥുന്‍റെ ഒപ്പം കുട്ടപ്പനുമുണ്ടാകും. മിഥുൻ പുറത്തെങ്ങാനും പോകാന്‍ സൈക്കിളെടുത്താൽ കുട്ടപ്പനും ഒപ്പം കൂടും.