ന്യൂഡൽഹി: സമ്പദ്‌വ്യവസ്ഥയെ പുനരുജ്ജീവിപ്പിക്കുന്നതിന് വ്യക്തിഗത ആദായനികുതി നിരക്കുകൾ കുറക്കുന്നതുൾപ്പെടെയുള്ള നടപടികൾ സർക്കാർ പരിഗണനയിലുണ്ടെന്ന് ധനമന്ത്രി നിർമ്മല സീതാരാമൻ. ജിഡിപി വളർച്ച ആദ്യ പാദത്തിൽ രേഖപ്പെടുത്തിയ അഞ്ച് ശതമാനത്തിൽ നിന്ന് നടപ്പ് സാമ്പത്തിക വർഷത്തിന്‍റെ രണ്ടാം പാദത്തിൽ ആറ് വർഷത്തെ ഏറ്റവും താഴ്ന്ന നിരക്കായ 4.5 ശതമാനമായി കുറഞ്ഞിരുന്നു. വളർച്ച ഉയർത്തുന്നതിന് ഓഗസ്റ്റ്, സെപ്റ്റംബർ മാസങ്ങളിൽ സർക്കാർ നിരവധി നടപടികൾ സ്വീകരിച്ചിട്ടുണ്ടെന്ന് എച്ച്‌ടി ലീഡർഷിപ്പ് ഉച്ചകോടിയിൽ ധനമന്ത്രി പറഞ്ഞു.
കഴിഞ്ഞ രണ്ട് മാസത്തിനുള്ളിൽ മാനദണ്ഡങ്ങളിൽ വിട്ടുവീഴ്‌ച വരുത്താതെ പൊതുമേഖലാ ബാങ്കുകൾ അഞ്ച് ലക്ഷം കോടി രൂപ വിതരണം ചെയ്‌തെന്നും ധനമന്ത്രി പറഞ്ഞു. ഉപഭോഗം കൂട്ടാൻ പല മാർഗങ്ങളും സ്വീകരിക്കുന്നുണ്ട്. നേരിട്ടുള്ള രീതി കൂടാതെ അടിസ്ഥാന സൗകര്യങ്ങൾക്കായി ചെലവഴിക്കുന്നത് വഴി പണം വ്യവസായ മേഖലയിലെ തൊഴിലാളികളിലേക്ക് എത്തിച്ചേരും. ആദായനികുതി നിരക്കിൽ മാറ്റം വരുത്തുന്നതുൾപ്പടെയുള്ളവ പരിഗണനയിലാണെന്നും നിർമ്മല സീതാരാമൻ പറഞ്ഞു.