ഇന്ത്യയുടെ സാമ്പത്തിക വളർച്ച നിരക്ക് കുറയുമെന്ന് ഏഷ്യൻ ഡെവലപ്മെന്‍റ് ബാങ്ക്

ഏപ്രിലിൽ എഡിബിയുടെ പ്രവചനം ഇന്ത്യ 11 ശതമാനം വളർച്ച കൈവരിക്കും എന്നായിരുന്നു.

ഹൈദരാബാദ്: നടപ്പ് സാമ്പത്തിക വർഷത്തെ ഇന്ത്യയുടെ സാമ്പത്തിക വളർച്ച നിരക്ക് കുറയുമെന്ന് ഏഷ്യൻ ഡെവലപ്മെന്‍റ് ബാങ്ക് (എഡിബി). 10 ശതമാനം ആയിരിക്കും ഇന്ത്യയുടെ വളർച്ച നിരക്ക് എന്നാണ് എഡിബിയുടെ പ്രവചനം. ഏപ്രിലിൽ എഡിബിയുടെ പ്രവചനം ഇന്ത്യ 11 ശതമാനം വളർച്ച കൈവരിക്കും എന്നായിരുന്നു.

ഇന്ത്യയുടെ ജിഡിപി വളർച്ച കഴിഞ്ഞ സാമ്പത്തിക വർഷം അവസാന പാദം 1.6 ശതനാമം വളർച്ച നേടിയിരുന്നു. എന്നാൽ ആകെ വളർച്ച എട്ട് ശതമാനത്തിൽ നിന്ന് 7.3 ശതമാനമായി ചുരുങ്ങിയിരുന്നു. അടുത്ത സാമ്പത്തിക വർഷം കൂടുതൽ ഇന്ത്യക്കാർ വാക്‌സിൻ എടുക്കുന്ന സാഹചര്യത്തിൽ ജിഡിപി ഏഴു ശതമാനത്തിൽ നിന്ന് 7.5 ശതമാനമായി ഉയരുമെന്നും എഡിബി പറയുന്നു.

ചൈനയുടെ ജിഡിപി വളർച്ച 2021 ൽ 8.1 ശതമാവും 2022ൽ 5.5 ശതമാനമായും ആയിരിക്കുമെന്നാണ് എഡിബിയുടെ പ്രവചനം. ഇന്ത്യയും ചൈനയും ഉൾപ്പടെയുള്ള ഉപമേഖലയിലെ വളർച്ച നിരക്ക് 2021ൽ 9.5ൽ നിന്ന് 8.9 ആയി കുറയും. എന്നാൽ 2022ൽ ഉപമേഖലയിലെ ആകെ വളർച്ച 6.6 ശതമാനത്തിൽ നിന്ന് 7 ശതമാനമായി വർധിക്കുമെന്നും എഡിബി പ്രവചിക്കുന്നു.

വളർച്ച രണ്ടക്കത്തിൽ എത്തുമെന്ന് ഫിച്ചും

നടപ്പ് സാമ്പത്തിക വർഷത്തെ രാജ്യത്തിന്‍റെ വളർച്ച നിരക്ക് 10 ശതമാനം ആയിരിക്കുമെന്നാണ് റേറ്റിങ് ഏജൻസിയായ ഫിച്ചും പ്രവചിച്ചിരുന്നു. നിലവിൽ എഡിബിയെ കൂടാതെ ഫിച്ച് മാത്രമാണ് സാമ്പത്തിക വളർച്ച രണ്ടക്കത്തിൽ എത്തുമെന്ന് പ്രവചിച്ചത്. ഇന്ത്യയുടെ സാമ്പത്തിക വളർച്ച 9.5 ആയി കുറയുമെന്നാണ് ആർബിഐയുടെ പ്രവചനം. നേരത്തെ രാജ്യം 10.5 ശതമാനം വളർച്ച നേടുമെന്നായിരുന്നു ആർബിഐ വിലയിരുത്തൽ.

അമേരിക്കൻ റേറ്റിങ് ഏജൻസിയായ മൂഡീസ് നടപ്പ് സാമ്പത്തിക വർഷം ഇന്ത്യയുടെ സാമ്പത്തിക വളർച്ച 9.3 ശതമാനം ആയിരിക്കുമെന്ന് പ്രവചിച്ചിരുന്നു. ജൂണ്‍ മാസം ആദ്യം ലോകബാങ്കും ഇന്ത്യയുടെ ജിഡിപി പ്രവചിച്ചിരുന്നു. ഈ സാമ്പത്തിക വർഷം ഇന്ത്യയുടെ ജിഡിപി വളർച്ച 10.1ൽ നിന്ന് 8.3 ശതമാനമായി കുറയുമെന്നായിരുന്നു ലോകബാങ്ക് വിലയിരുത്തിയത്.

ഇന്ത്യൻ റേറ്റിങ് ഏജൻസിയായ ഐസിഐആർഎ 8.5 ശതമാനവും ബ്രിട്ടീഷ് ഏജൻസി ബാർക്ലെയ്‌സ് 9.2 ശതമാനം വളർച്ചാനിരക്കുമാണ് പ്രവചിക്കുന്നത്. 9.5 ശതമാനമായി കുറയുമെന്നാണ് ഗ്ലോബൽ റേറ്റിങ് ഏജൻസിയായ എസ്&പിയുടെ നിരീക്ഷണം.