ജമ്മുവിൽ പുതിയ ഭക്ഷ്യ സംസ്കരണ കേന്ദ്രം ആരംഭിക്കാൻ ഒരുങ്ങി ലുലു ഗ്രൂപ്പ്

ലുലു ഗ്രൂപ്പിന്‍റെ സൂപ്പർമാർക്കറ്റുകൾക്ക് ആപ്പിളും മറ്റ് പഴങ്ങളും വിതരണം ചെയ്യുന്നതിനായി ലുലു ഗ്രൂപ്പും ഫ്രൂട്ട് മാസ്റ്റർ അഗ്രോ ഫ്രെഷ് ജമ്മു കശ്മീരും തമ്മിൽ ധാരണാപത്രം ഒപ്പിട്ടു

ന്യൂഡൽഹി: ജമ്മു കശ്മീരിൽ നിന്ന് വിവിധതരം കാർഷിക ഉൽ‌പന്നങ്ങൾ ലഭ്യമാക്കുന്നതിനായി ശ്രീനഗറിൽ ഭക്ഷ്യ സംസ്കരണ കേന്ദ്രം ആരംഭിക്കുമെന്ന് യുഎഇ ആസ്ഥാനമായുള്ള ലുലു ഗ്രൂപ്പ് അറിയിച്ചു. യുഎഇ - ഇന്ത്യ ഭക്ഷ്യസുരക്ഷാ ഉച്ചകോടിക്കിടെ ജമ്മു കശ്മീർ സർക്കാർ പ്രിൻസിപ്പൽ സെക്രട്ടറി (കാർഷിക ഉൽപാദന, ഹോർട്ടികൾച്ചർ) നവീൻ കുമാർ ചൗധരിയുടെ നേതൃത്വത്തിലുളള പ്രതിനിധി സംഘവുമായി ലുലു ഗ്രൂപ്പ് ചെയർമാൻ എം‌എ യൂസഫലി ചർച്ച നടത്തിയിരുന്നു. ഇതിന്‍റെ ഭാഗമായിട്ടാണ് തീരുമാനം.

ഗൾഫ് രാജ്യങ്ങളിലുടനീളമുള്ള ലുലു ഗ്രൂപ്പിന്‍റെ സൂപ്പർമാർക്കറ്റുകൾക്ക് ആപ്പിളും മറ്റ് പഴങ്ങളും വിതരണം ചെയ്യുന്നതിനായി ലുലു ഗ്രൂപ്പും ഫ്രൂട്ട് മാസ്റ്റർ അഗ്രോ ഫ്രെഷ് ജമ്മു കശ്മീരും തമ്മിൽ ധാരണാപത്രം ഒപ്പിട്ടതായി ഔദ്യോഗിക പ്രസ്‌താവനയിൽ പറയുന്നു.

ലുലു കശ്മീരിൽ നിന്ന് ആപ്പിളും കുങ്കുമവും യുഎഇയിൽ ഇറക്കുമതി ചെയ്യുന്നു. കരാർ ഒപ്പിട്ടതോടെ വരും വർഷങ്ങളിൽ ഇറക്കുമതി ഗണ്യമായി വർധിക്കും. കൊവിഡ് -19 മൂലം സമീപകാലത്ത് നിരവധി വെല്ലുവിളികൾ ഉണ്ടായിരുന്നിട്ടും ലുലു ഗ്രൂപ്പ് 400 ടണ്ണിലധികം കശ്മീർ ആപ്പിൾ ഇറക്കുമതി ചെയ്തു.

ലുലു ഗ്രൂപ്പിന്‍റെ സ്റ്റോറുകൾ ഉപയോഗിച്ച് ജമ്മു കശ്മീരിൽ നിന്ന് കാർഷിക, ഹോർട്ടികൾച്ചർ ഉൽപ്പന്നങ്ങൾ മുഴുവൻ ഗൾഫ് മേഖലയിലേക്കും കയറ്റുമതി ചെയ്യുന്നത് പ്രോത്സാഹിപ്പിക്കുന്നതിന് തീരുമാനങ്ങൾ എടുത്തിട്ടുണ്ടെന്ന് യോഗത്തിൽ നവീൻ കുമാർ ചൗധരി പറഞ്ഞു. ലുലുവിന് ജമ്മുകാശ്‌മീരിൽ ഭക്ഷ്യ സംസ്കരണ കേന്ദ്രം ആരംഭിക്കുന്നതിനുമ പ്രവർത്തനം വിപുലപെടുത്തുന്നതിനും എല്ലാ സഹായവും അദ്ദേഹം ഉറപ്പ് നൽകി.