അടുത്ത ഖരീഫ് സീസണിനു വേണ്ടിയുള്ള ഇന്ത്യയിലെ വിത്തുല്‍പ്പാദനത്തെ കൊവിഡ് 19 മൂലമുണ്ടായിരിക്കുന്ന പ്രതിസന്ധികള്‍ കാര്യമായി ബാധിക്കുമെന്ന ആശങ്ക ഉയര്‍ന്നിരിക്കുന്നു. വിത്തുകള്‍ സംസ്‌കരിക്കുകയും പാക്കു ചെയ്യുകയും ചെയ്യുന്ന പ്രക്രിയ സമ്പൂര്‍ണ്ണമായി ബാധിച്ചിരിക്കുകയാണ്. വിത്തു സംസ്‌കരണവുമായി വ്യവസായങ്ങള്‍ക്ക് മുന്നോട്ട് പോകാന്‍ ആവില്ലെങ്കില്‍ അടുത്ത മാസം മുതല്‍ രാജ്യത്തെ വിത്തു വില്‍പ്പന ബുദ്ധിമുട്ടിലാകുമെന്ന് ദേശീയ വിത്തു കോര്‍പ്പറേഷന്‍ ഈയിടെ കേന്ദ്ര, സംസ്ഥാന സര്‍ക്കാരുകളുടെ ശ്രദ്ധയില്‍ പെടുത്തിയിരുന്നു. നിലവിലുള്ള സീസണില്‍ ഒക്‌ടോബര്‍ മുതല്‍ കൃഷി ചെയ്തു വരുന്ന വിത്തു വിളകള്‍ ഇപ്പോള്‍ വിളവെടുപ്പിന്‍റെ ഘട്ടത്തിലാണ്. ഈ വിളവെടുപ്പ് കഴിഞ്ഞാല്‍ സംസ്‌കരണ കേന്ദ്രങ്ങളിലേക്ക് കൃഷിയിടങ്ങളില്‍ നിന്നും വിത്തുകള്‍ അയക്കേണ്ടതുണ്ട്. അവിടെ സംസ്‌കരണവും ഗുണനിലവാര പരിശോധനയും കഴിഞ്ഞാല്‍ മാത്രമേ ഖരീഫ് സീസണു വേണ്ടി അവ വില്‍ക്കാനാവൂ.
തെലങ്കാന കാര്‍ഷിക വകുപ്പ് 7.50 ലക്ഷം ക്വിന്‍റല്‍ വിത്തുകള്‍ ഇളവ് നിരക്കില്‍ കര്‍ഷകര്‍ക്ക് നേരിട്ട് വില്‍ക്കാന്‍ പദ്ധതിയിടുന്നു. ഇത് നടപ്പില്‍ വരുത്തുന്നതിനായി കര്‍ഷകരില്‍ നിന്നും വിത്തുകള്‍ വാങ്ങി അവ സംസ്‌കരണ ശാലകളിലേക്ക് അയക്കേണ്ടതുണ്ട്. വിത്തുകള്‍ അവശ്യ സേവന പട്ടികയിലാണ് ഉള്‍പ്പെടുന്നത്. അവശ്യ സേവനങ്ങള്‍ പതിവ് പോലെ പ്രവര്‍ത്തിക്കുവാന്‍ സര്‍ക്കാര്‍ അനുവദിച്ചിരിക്കുന്നതിനാല്‍ ഈ അടച്ചിടല്‍ കാലത്ത് വിത്ത് സംസ്‌കരണ ശാലകള്‍ പ്രവര്‍ത്തിക്കുവാനും അനുവദിക്കണമെന്ന് താന്‍ കേന്ദ്ര കൃഷി സെക്രട്ടറിക്കും സംസ്ഥാന കൃഷി മന്ത്രിക്കും എഴുതിയിട്ടുണ്ട് എന്ന് എന്‍.എസ്.സി പ്രസിഡന്‍റ് എന്‍ പ്രഭാകരറാവു പറഞ്ഞു. വിത്ത് കമ്പനികളില്‍ ജോലി ചെയ്യുന്ന ജീവനക്കാരെ അവരുടെ തിരിച്ചറിയല്‍ കാര്‍ഡ് കാണിച്ചാല്‍ യാത്ര ചെയ്യാന്‍ അനുവദിക്കണമെന്നും വിത്തുകള്‍ കൊണ്ടു പോകുന്ന ട്രക്കുകള്‍ പൊലീസ് തടയരുതെന്നും അദ്ദേഹം ആവശ്യപ്പെട്ടു.