ഇന്ത്യയെ ശക്തിപ്പെടുത്താനാണ് കേന്ദ്രസര്‍ക്കാര്‍ പ്രവര്‍ത്തിക്കുന്നതെന്ന് നിതിന്‍ ഗഡ്കരി

ഞങ്ങൾ വിപുലീകരണവാദികളല്ല, ഒരു രാജ്യത്തെ തീവ്രവാദത്തെയും പിന്തുണച്ചിട്ടുമില്ല' കേന്ദ്ര മന്ത്രി നിതിൻ ഗഡ്കരി രാജസ്ഥാനില്‍ നടത്തിയ ജൻ സംവാദിന്റെ വെർച്വൽ റാലിയില്‍ പങ്കെടുത്തുകൊണ്ട് പറഞ്ഞു

ന്യൂഡല്‍ഹി:ശക്തമായ ഒരു രാജ്യത്തിന് തങ്ങളുടെ ജനങ്ങളെ സംരക്ഷിക്കാനും സമാധാനം സ്ഥാപിക്കാനും കഴിയുമെന്നതിനാൽ ഇന്ത്യയെ ശക്തിപ്പെടുത്താൻ കേന്ദ്രത്തിലെ ബിജെപി സർക്കാർ പ്രവർത്തിക്കുന്നുണ്ടെന്ന് കേന്ദ്ര മന്ത്രി നിതിൻ ഗഡ്കരി പറഞ്ഞു. 'ഞങ്ങൾ വിപുലീകരണവാദികളല്ല, ഒരു രാജ്യത്തെ തീവ്രവാദത്തെയും പിന്തുണച്ചിട്ടുമില്ല' ഗഡ്കരി രാജസ്ഥാനില്‍ നടത്തിയ ജൻ സംവാദിന്റെ വെർച്വൽ റാലിയില്‍ പങ്കെടുത്തുകൊണ്ട് പറഞ്ഞു.

'ഞങ്ങൾ സമാധാനവും അഹിംസയുമാണ് ആഗ്രഹിക്കുന്നത്. എന്നാൽ ശക്തരായ ആളുകൾക്ക് മാത്രമേ അവരുടെ ജനങ്ങളെ സംരക്ഷിക്കാനും സമാധാനം സ്ഥാപിക്കാനും കഴിയൂ. അതിനാലാണ് ഇന്ത്യയെ ശക്തിപ്പെടുത്താൻ ഞങ്ങൾ ശ്രമിക്കുന്നത്' അദ്ദേഹം കൂട്ടിച്ചേർത്തു.

കൊവിഡ് -19 പടർന്നുപിടിച്ച സാഹചര്യത്തിൽ വിദേശ നിക്ഷേപകർ ചൈനയിൽ നിന്ന് ഇന്ത്യയിലേക്ക് ശ്രദ്ധതിരിക്കുന്നതിനാൽ രാജ്യത്തിന്റെ കയറ്റുമതിയിൽ ശ്രദ്ധ കേന്ദ്രീകരിക്കേണ്ടതുണ്ടെന്ന് കേന്ദ്ര മന്ത്രി നിതിന്‍ ഗഡ്കരി നേരത്തെ പറഞ്ഞിരുന്നു.

'ലോകം മുഴുവൻ ഇപ്പോൾ ചൈനയുമായി ഇടപഴകാൻ വലിയ താല്പര്യം കാണിക്കുന്നില്ല. ഇത് ഇന്ത്യൻ സമ്പദ്‌വ്യവസ്ഥക്ക് ലഭിക്കുന്ന ഒരു അനുഗ്രഹമാണ്. ലോകത്തിന്‍റെ വിവിധ ഭാഗങ്ങളിൽ നിന്നുള്ള ധാരാളം ആളുകൾ ഇന്ത്യയുമായി ഇടപെടാൻ ആഗ്രഹിക്കുന്നു. ഈ സാഹചര്യത്തിൽ നാം നമ്മുടെ കയറ്റുമതി വര്‍ധിപ്പിച്ച് ഇറക്കുമതിയും കുറക്കുകയാണ് വേണ്ടത്' അദ്ദേഹം പറഞ്ഞു.