മാഞ്ചസ്റ്റര്‍: ചെമ്പടയെ വെല്ലുവിളിച്ച് മാഞ്ചസ്റ്റര്‍ സിറ്റിയുടെ ഇംഗ്ലീഷ് മധ്യനിര തരാം ഫില്‍ ഫോഡന്‍. ഈ സീസണില്‍ കിരീടം സ്വന്തമാക്കിയ ലിവര്‍പൂളിനെ അഭിനന്ദിക്കുന്നു. പക്ഷെ അടുത്ത സീസണായി ഞങ്ങള്‍ തയ്യാറായി കഴിഞ്ഞു. ഫോഡന്‍ ട്വീറ്റ് ചെയ്തു. ലിവര്‍പൂളിനെതിരായ മത്സരത്തില്‍ ആദ്യ പകുതിയിലെ അധിക സമയത്ത് ഫോഡനാണ് സിറ്റിക്കായി മൂന്നാമത്തെ ഗോള്‍ നേടിയത്.
അടുത്ത സീസണില്‍ കാണാം; ലിവര്‍പൂളിനെ വെല്ലുവിളിച്ച് ഫില്‍ ഫോഡന്‍
ഹോം ഗ്രൗണ്ടായ എത്തിഹാദ് സ്റ്റേഡിയത്തില്‍ നടന്ന മത്സരത്തില്‍ മാഞ്ചസ്റ്റര്‍ സിറ്റി ഏകപക്ഷീയമായ നാല് ഗോളുകള്‍ക്ക് ചാമ്പ്യന്‍മാരായ ലിവര്‍പൂളിനെ പരാജയപ്പെടുത്തിയ ശേഷമാണ് മധ്യനിര താരം ഫില്‍ ഫോഡന്‍റെ വെല്ലുവിളി. ഇപിഎല്ലിലെ ഈ സീസണില്‍ സിറ്റിയും ലിവര്‍പൂളും നേര്‍ക്കുനേര്‍ വരുന്ന അവസാന മത്സരം കൂടിയായിരുന്നു ഇത്.
ഫില്‍ ഫോഡന്‍
മത്സരത്തില്‍ ഏകപക്ഷീയമായ നാല് ഗോളുകളുടെ വമ്പന്‍ തോല്‍വിയാണ് ചെമ്പടയുടെ നായകന്‍ ഹെന്‍ഡേഴ്‌സണും കൂട്ടരും ഏറ്റുവാങ്ങിയത്. ഇപിഎല്ലിലെ ഈ സീസണില്‍ ലിവര്‍പൂള്‍ ഏറ്റുവാങ്ങുന്ന രണ്ടാമത്തെ തോല്‍വിയാണ് ഇത്. കിരീടം ഉറപ്പിച്ച ശേഷം ഇപിഎല്ലില്‍ ആദ്യമായാണ് ലിവര്‍പൂള്‍ മത്സരിക്കാന്‍ ഇറങ്ങുന്നതെന്ന പ്രത്യേകതയുമുണ്ടായിരുന്നു. മത്സരത്തില്‍ ഫോഡനെ കൂടാതെ കെവിന്‍ ഡി ബ്രൂയിന്‍, റഹീം സ്‌റ്റെര്‍ലിങ് എന്നിവരും സിറ്റിക്കായി ഗോളുകള്‍ സ്വന്തമാക്കി. അലക്‌സ് ചേംബര്‍ലിനിന്‍റെ ഓണ്‍ ഗോളും സിറ്റിക്ക് തുണയായി. സിറ്റി ജൂലായ് അഞ്ചിന് നടക്കുന്ന അടുത്ത മത്സരത്തില്‍ സതാംപ്റ്റണിനെ നേരിടും. അന്നേ ദിവസം നടക്കുന്ന മറ്റൊരു മത്സരത്തില്‍ ആസ്റ്റണ്‍ വില്ലയാണ് ലിവര്‍പൂളിന്‍റെ എതിരാളികള്‍.